«Ամեն ինչ դեռ ավարտված չէ: Մենք անապատի մեջ ենք, մենք 30-րդ տարում ենք գտնվում, շատ նշանակալի և կարևոր հանգրվանի ենք հասել, իմ հոգևոր ընկալումով տասը տարի ժամանակ ունենք՝ վերջնականապես Ավետյաց երկրի խոստումն իրականացնելու, ամբողջական պետություն դառնալու, որպես պետականություն ունեցող ազգ դառնալու: Այս մասին «Առաջին լրատվական»-ի հետ զրույցում ասաց Հայ առաքելական եկեղեցու Տավուշի թեմի առաջնորդ Բագրատ եպիսկոպոս Գալստանյանը, ով նույնպես պատերազմի օրերին եղել է Արցախում:
«Ինչ վերաբերում է պատերազմի 44 օրերին, խորքային շատ կարևոր մի վերլուծություն կա՝ մենք չընկալեցինք, որ սա հայրենական պատերազմ է: Մենք հռչակեցինք հայրենական պատերազմ, բայց չգործեցինք հայրենական պատերազմի սկզբունքներով և կանոններով»,- նշեց Սրբազանը՝ հավելելով, որ ռազմաքաղաքական ղեկավարության հռետորաբանությունը և ուղերձները թելադրում էին, որ պատրաստ ենք պատերազմին, սակայն խնդիրը սարսափելի անկազմակերպվածությունն էր, և արդեն պատերազմի 5-6-րդ օրերին դա ակնհայտ էր:
«Այս պատերազմում ես հաղթանակ էլ եմ տեսել»,- նշեց Բագրատ եպիսկոպոս Գալուստյանը՝ նկատելով, որ մի ճակատում նույն արսենալով կարողացել են դիմակայել, մյուսում՝ ոչ: «Ես չեմ կարծում, որ դավաճանություն, դավադրություն է եղել, և ըստ տրամաբանության՝ այսպես չպետք է լիներ»,- նշեց Սրբազանը՝ ևս մեկ անգամ ընդգծելով, որ ամենամեծ խնդիրը հայրենական պատերազմի գիտակցումը չունենալը և անկազմակերպվածությունն է եղել:
Անդրադառնալով ներքին զարգացումներին և համացանցի դրսևորումներին՝ Բագրատ եպիսկոպոս Գալստանյանը նշեց. «Մենք բաժան, բաժան, ինքնաոչնչացմամբ չենք կարող առաջ գնալ. մեզ հրատապ հաշտության օրակարգ է պետք»:
Մանրամասն՝ տեսանյութում:
