Սաուդյան Արաբիայի Saudi Aramco նավթային ընկերությունը բարձրացրել է հունվար ամսին Ասիայի գնորդներին առաքվելիք նավթի գները: Ինչպես կիրակի օրը հաղորդել է Bloomberg-ը, որոշումն ընդունվել է նավթի գների աճի ֆոնին՝ նոր տիպի կորոնավիրուսի դեմ պատվաստանյութի մասին լուրերից հետո:
Գործակալության տվյալներով, Saudi Aramco-ն արաբական թեթև տեսակի նավթի մեկ բարելի գինը բարձրացրել է 80 ցենտով, ուստի այս տեսակի պրեմիումը կկազմի մեկ բարելի դիմաց 30 ցենտ:
Ինչպես նշում է Bloomberg-ը, ավելի վաղ սպասվում էր, որ Arab Light-ի գինը մեկ բարելի դիմաց կբարձրանա 65 ցենտով: Նշվում է, որ վերջին երեք ամիսների ընթացքում սաուդյան ընկերությունը նվազեցնում էր Arab Light-ի գինը՝ կորոնավիրուսի համավարակի երկրորդ ալիքի պատճառով նավթի պահանջարկի անկման ֆոնին:
Ընկերությունը բարձրացրել է նաև Միջերկրածովյան տարածաշրջան մատակարարումների գները՝ դրանք անփոփոխ թողնելով Հյուսիսարևմտյան Եվրոպայի համար: Միևնույն ժամանակ, տեղի է ունեցել ԱՄՆ մատակարարումների գնի նվազում՝ այս տարվա մայիսից ի վեր ամենացածր մակարդակի:
Սաուդյան Արաբիան առաքումների ժամանակացույցը կազմում է յուրաքանչյուր ամսվա սկզբին՝ սպառողների պահանջների հիման վրա:
Հինգշաբթի օրը, OPEC+-ի նախարարները, մի քանի շաբաթ տևած լարված բանակցություններից հետո, ի վերջո կարողացել են համաձայնության գալ 2021 թվականի հունվարից նավթի արդյունահանման կրճատման ծավալի շուրջ: Դեկտեմբերի 3-ին կայացած հանդիպմանը նախապատվությունը տրվել է Ռուսաստանի կողմից ի սկզբանե առաջադրված սցենարին. նավթ արտահանողները նոր տարուց կկարողանան աստիճանաբար ավելացնել արդյունահանումը՝ ամսական 0.5 մլն բարել/օր: