«Հակամարտությանը տևական ու կայուն քաղաքական լուծում գտնելու հարցում Միացյալ Նահանգները պատրաստ է շարունակել իր ջանքերը ԵԱՀԿ Մինսկի խմբի ներքո»,- Երևանում հայտարարել է ԱՄՆ դեսպան Լին Թրեյսին, որը հանդիպում է ունեցել ոչ կառավարական կազմակերպությունների ներկայացուցիչների հետ, որոնք ներգրավված են գործընթացում մարդասիրական համատեքստում:
«Առաջին լրատվական»-ը թեմայի շուրջ զրուցեց հանդիպմանը մասնակցած Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանի հետ։
– Տիկին Վարդանյան, ի՞նչ տպավորություն ունեք, Միացյալ Նահանգներն այս փուլում կակտիվացնի՞ ջանքերը արցախյան հակամարտության կարգավորման ուղղությամբ։
– Ես մեծ հույսեր ունեմ։ Մինսկի խմբի առաքելության էությունը չի փոխվել։ Խումբը պետք է աշխատի, որ խաղաղություն ձեռք բերվի տարածաշրջանում։ Թե ինչպես՝ այս պահին պարզ չէ։ Այս պահին կան հանդիպումներ, քննարկումներ, ու հույս ունեմ, որ առաջիկա շաբաթների ընթացքում համանախագահները կայցելեն տարածաշրջան ու իրավիճակն իրենց աչքերով կտեսնեն։ Սեփական աչքերով տեսնելն ամենաճիշտն է, կարդալով ու ուրիշներից լսելով ճիշտ պատկերացում չեն կազմի։ Իրենք պետք է հնարավորություն ունենան հարցեր տալու ու իմանալու, թե ինչ է կատարվել իրականում։ Այս դեպքում կկարողանան հարցերին ավելի ճիշտ մոտեցում ցույց տալ։ Բոլորս գիտենք, որ սա խաղաղություն չէ, զինադադար է։ Հստակեցված չէ նաև Ղարաբաղի կարգավիճակը։ Անվտանգությունը մեզ բոլորիս համար առաջնային խնդիր է։ Հուսով եմ, որ համանախագահները առաջիկայում իսկապես կայցելեն ու միասին կաշխատեն տևական խաղաղության հաստատման համար։ Իրավիճակը պետք է փոխվի ու հայերի անվտանգությունն ապահովվի։
– Եթե Միացյալ Նահանգներն ակտիվացնի իր ջանքերը, մենք որոշ չափով դուրս կգա՞նք ռուս-թուրքական պայմանավորվածությունների լծից։ Հայտնի է, որ այս պայմանավորվածությունը Ռուսաստանի ջանքերով եղավ, և որոշակիորեն դուրս մնացին ԱՄՆ-ն ու Ֆրանսիան։
– Հուսով եմ, որ դա կլինի։ Բայց նաև գիտակցում եմ, որ այս ժամանակաշրջանում ԱՄՆ-ում բարդ իրավիճակ է։ Կոնգրեսը եկող շաբաթ վերադառնալու է աշխատանքի, տարին վերջանում է, նորընտիր նախագահ Բայդենն էլ ստանձնելու է իր պարտականությունները հունվարի 20-ից։ Մինչ այդ ժամանակաշրջանը Կոնգրեսը շատ ջանքեր չի գործադրելու, որոշ կոնգրեսականներ դուրս են մնացել, չեն վերընտրվել կամ հրաժարական են տվել։ Չեմ կարող վստահ ասել, որ այս ընթացքում ԱՄՆ ջանքերը շատ կլինեն, բայց հույսս Մինսկի խմբի համանախագահներն են, որոնք կգան տարածաշրջան ու հստակ անելիքներ կնշմարեն։ Պետք է աշխարհի բոլոր հայերը քարոզեն ճշմարտությունը։ Ճանաչման գործընթացն ինչքան շուտ սկսվի, այնքան լավ։
– Հույսեր կա՞ն, որ Բայդենի վարչակազմն այլ քաղաքականություն կորդեգրի։
– Հուսով ենք, որ այո՛։ Այսքան ժամանակ արցախյան խնդիրն ականջի հետև են գցել ԱՄՆ-ում։