ԱՄՆ նախկին նախագահներ Բարաք Օբաման, Ջորջ Բուշը և Բիլ Քլինթոնը մտադիր են կորոնավիրուսային վարակի դեմ հրապարակայնորեն պատվաստվել, որպեսզի դրանով ոգևորեն ամերիկացիներին: Այս մասին հայտարարել է CNN հեռուստաալիքը:
Նշվում է, որ նրանք կպատվաստվեն այն ժամանակ, երբ Սննդամթերքի և դեղերի վարչությունը (FDA) հաստատի պատվաստանյութի օգտագործումը:
Հայտնի է, որ Բուշն ավելի վաղ դիմել է Ալերգիայի և ինֆեկցիոն հիվանդությունների ազգային ինստիտուտի տնօրեն Էնթոնի Ֆաուչին և COVID-19-ին արձագանքող Սպիտակ տան համակարգող Դեբորա Բիրկսին՝ պարզելու, թե ինքն ինչպես է կարող օգտակար լինել պատվաստանյութի խթանման գործում:
«Նախ, պատվաստանյութերը պետք է համարվեն անվտանգ և արվեն բնակչության գերակա խմբերին: Այնուհետև նախագահ Բուշը կհերթագրվի պատվաստվելու համար և ուրախությամբ դա կանի տեսախցիկների առջև»,- ասել է նախկին նախագահի աշխատակազմի ղեկավար Ֆրեդի Ֆորը:
Քլինթոնը նույնպես ցանկություն է հայտնել պատվաստվել հանրության առջև, հենց որ այն հասանելի դառնա: Իր հերթին, SiriusXM ռադիոկայանին տված հարցազրույցում Օբաման էլ խոսել է իր մտադրության մասին: Նա նշել է, որ լիովին վստահում է Ֆաուչիին:
