«Հայեր» մեդիահարթակի գլխավոր խմբագիր Արայիկ Մանուկյանը ֆեյսբուքյան իր էջում գրել է.
Ճիշտ 100 տարի առաջ, դեկտեմբերի 2-ի լույս 3-ի գիշերը (դարձյալ գիշերով) դաշնակցական Ալեքսանդր Խատիսյանը ստորագրեց Ալեքսանդրապոլի դաշնագիրը, որով Թուրքիային հանձնվեցին Կարսի նահանգը, Սուրմալուի գավառը և այլն: Չմանրամասնենք:
Ճիշտ 100 տարի անց, Ամենայն Հայոց Կաթողիկոսի հորդորով հացադուլը դադարեցրած դաշնակցական գործիչներ և երիտասարդներ «Արժանապատվության երթ»-ով, «Նիկոլ դավաճան» կարգախոսով պահանջում են նոյեմբերի 9-ի լույս 10-ի գիշերվա (դարձյալ գիշերով) հայտարարագրով Արցախի Հանրապետության տարածքի զգալի մասը Ադրբեջանին հանձնած, Հայաստանի ինքնիշխանությունը վտանգած Նիկոլ Փաշինյանի հրաժարականը:
100 տարի հետո (պատմությունը հայերիս մոտ կրկնվելու հատկություն ունի) «Քաղաքացիական պայմանգիր» կուսակցության անդամներ, Իմքայլական մի նոր Ռուբինյան ու մի նոր Մակունց կառավարության շենքի մոտ (ենթադրաբար) «Հրանտ դավաճան» կարգախոսով ու հացադուլով կպահանջեն դաշնակցական կառավարության ու վարչապետ ընկեր Հրանտի հրաժարականը՝ հերթական հայկական տարածքները զիջելու համար և Ամենայն Հայոց Կաթողիկոսի (իսկ ավելի հավանական է՝ Համայն Ռուսիո Պատրիարքի) հորդորով կդադարեցնեն հացադուլն ու պայքարը կշարունակեն «Վերականգնումի երթով»:
Իրականության ու պատրանքի մեջ հարյուրամյակներով խարխափող հայ ժողովուրդ:
Հ.Գ. Ներկա իրողությունն ու պատմական հեռանկարն, անշուշտ, չեն փոխում Նիկոլ Փաշինյանի սահմանադրորեն հրաժարական տալու անհրաժեշտությունը: