Ավտոմեքենայի հետքը ցույց է տալիս, որ Տրիերում կասկածյալը դիտավորյալ հետապնդել է հետիոտներին, հայտարարել է Ռեյնլանդ-Պֆալցի ՆԳՆ ղեկավար Ռոգեր Լեվենցը: Նրա խոսքերը փոխանցում է «ՌԻԱ Նովոստի»-ն:
«Մենք այսօր որոշ հեռավորությունից ուսումնասիրել ենք դեպքի վայրը, և կատարվածից ելնելով պետք է տեսնել, որ այս զիգզագները միտումնավոր են արված մարդկանց վրաերթի ենթարկելու և նրանց ցավ պատճառելու համար, և դա արվել է բազմիցս»,- ասել է նախարարը:
Նա հայտնել է, որ միջադեպի հետևանքով չորս մարդ է զոհվել, ևս 14-ը վիրավորվել են. չորս ծանր վիրավորներ, չորս միջին ծանրության և վեց թեթև վիրավորներ:
Ավելի վաղ հաղորդվել էր, որ Տրիեր քաղաքում Գերմանիայի 51-ամյա քաղաքացին հարբած վիճակում վրաերթի է ենթարկել հետիոտներին: Վարորդը բերման է ենթարկվել: Ոստիկանությունը հնարավոր է համարել, որ նա հոգեկան խնդիրներ ունի: