Օրվա հրատապ խնդիրը գերիների հարցն է: Ո՞ր օղակն ինչ աշխատանքներ է իրականացնում այս խնդրի լուծման ուղղությամբ: «Առաջին լրատվական»-ի հետ զրույցում անդրադառնալով այս հարցին, Ազգային ժողովի պատգամավոր, «Հանուն հանրապետության» կուսակցության ղեկավար մարմնի անդամ Արման Բաբաջանյանը նշեց, որ Կառավարությունը, համապատասխան գերատեսչությունները շատ հետևողական աշխատանքներ են տանում այս խնդրով զբաղվող միջազգային կառույցների, ԿԽՄԿ-ի, նաև ռուս խաղաղապահների հետ:
«Անձամբ ես ծնողների տարբեր խմբերի հետ սերտորեն կապի մեջ եմ, այդ թվում նաև այսօր այցելել եմ Մայր Աթոռ Սուրբ Էջմիածին: Վեհափառին ես և «Իմ քայլը» խմբակցության պատգամավոր, ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը առաջարկ ենք ներկայացրել, և հույս ունենք, որ այդ ուղղությամբ կկարողանանք որոշակի հաջողության հասնել: Եկեղեցին և Ամենայն Հայոց Կաթողիկոսը պատրաստակամ են ցանկացած միջոց գործադրել: Վեհափառն արդեն լավ մեկնարկ է տվել այդ առաջարկին»:
Անդրադառնալով դիտարկմանը, որ ինչ-որ բան կա, որին հանրությունը չի տիրապետում, պատգամավորը նշեց, որ իհարկե կա: «Սրանք գործընթացներ են, որոնք վերաբերում են ոչ միայն գերիներին, այլ նաև Ադրբեջանի ցանկությանը՝ գերիների խնդրով լուծելու նաև Հայաստանի մի շարք ներքաղաքական հարցեր: Տեսնում ենք, որ երկիրը ներսից բզկտելու գործընթացը ձեռնտու է Հայաստանում մի շարք շրջանակների: Եվ Ադրբեջանը օգտվում է այդ իրավիճակից: Այդ տրամադրությունները ոռոգվում են դրսից»,- ասաց Բաբաջանյանը:
Պատգամավորը նշեց նաև, որ կասկած չունի՝ Ռուսաստանն ակնդետ հետևում է այս խնդրին. «Ամենաբարձր մակարդակով շփումներ կան, ՀՀ նախագահը նամակ է հղել ՌԴ նախագահ Պուտինին, նույնիսկ Ամենայն Հայոց Կաթողիկոսն է դիմել Պուտինին, վարչապետն է ամենօրյա կապի մեջ նրա հետ, բայց սա բացարձակապես Ռուսաստանից կախված չէ: Սա բազմաթիվ թելեր ունեցող խնդիր է, որոնց կարևորությունն այս պահին չեմ կարող բացահայտել և նկարագրել, բայց դրանք պայամանավորելու են մեր երկրի սուբյեկտայնությունն ու ինքնիշխանության շատ կարևոր տարրեր: Հույս ունեմ, որ պատասխանատուները՝ Կառավարությունը, ՊՆ և ԱԳՆ-ն կկարողանան հաղթահարել այս ճգնաժամը ճիշտ մենեջմենթի շնորհիվ»:
Պատգամավորի խոսքով՝ Ադրբեջանն այսօր հայտարարել է, որ պատրաստ է «բոլորը բոլորի դիմաց» ձևաչափով մեկնարկ տալ գործընթացին: «Ես դեռևս չգիտեմ, ինչ է պատասխանել հայկական կողմը, այստեղ ևս դժվարություններ կան, որովհետև մեր կողմից ֆիքսված թիվը այլ է, այլ աղբյուրներից ստացած տվյալները բոլորովին այլ են, և դժվար է հասկանալ, թե ինչ թվով գերիների հետ գործ ունենք: Եվ կարևոր է, թե ինչ ենք հասկանում «բոլորը բոլորի դիմաց» ձևաչափով գործընթացի իրականացում ասելով»,- նշեց Բաբաջանյանը:
Անդրադառնալով ներքաղաքական զարգացումներին, պատգամավորն ընդգծեց, որ վերջին զարգացումները տանում են արտահերթ ընտրությունների: «Բայց այս պայմաններում գնալ արտահերթ ընտրությունների, նշանակում է հրաժարվել ժողովրդավարությունից, իսկ ժողովրդավարությունը շարունակում է Հայաստանի անվտանգության կարևորագույն բաղադրիչ լինել: Մինչև արտահերթ ընտրությունները արագորեն պետք է դատական իշխանության և Ընտրական օրենսգրքի բարեփոխումներ իրականացնել»,- նշեց Բաբաջանյանը:
Անդրադառնալով հարցին, թե ինչ է կատարվում Մինսկի խմբում, պատգամավորը նշեց, որ վարչապետի հետ թե՛ առաջին, թե՛ երկրորդ հանդիպման ժամանակ նա նկարագրել է իրավիճակներ, որոնց ընթացքում վարչապետը կիսվել է միայն ՌԴ նախագահի հետ: «Մինսկի խմբի կազմաքանդման գործընթացը սկսվել է այն պահից, երբ մենք՝ ինքներս, հրաժարվել ենք գործընթացներին Մինսկի խմբի ամբողջական մասնակցությունից և դերակատարությունից և կրակի դադարեցման գործում բացառապես ապավինել ենք Ռուսաստանի դերակատրությանը:
Մենք ինչո՞ւ չդիմեցինք Մինսկի խմբի մյուս գործընկերներին և ինչո՞ւ տեղյակ չպահեցինք խնդրի կարգավորման այն պլանի մասին, որն ամեն օր հասունանում էր: Իսկ այսօր ակնկալում ենք, որ Մինսկի խմբի ձևաչափը կրկին կգործի: Մինսկի խմբի առանձին անդամների համար ևս անակնկալ է եղել ստորագրված փաստաթուղթը: Եվ տարօրինակ է, որ կողմերից առնվազն հայկական կողմը ՄԻնսկի խմբին անդամներին չէր իրազեկել այդ փաստաթղթի բովանդակության մասին»,- նշեց Բաբաջանյանը:
Պատգամավորն ընդգծեց, որ 98թ. ի վեր որևէ ջանք չի գործադրվել, որպեսզի խաղաղությունը տեղ գտնի բանակցային գործընթացում և թույլ չտալ, որ պատերազմ տեղի չունենա: «Մենք հավելյալ ջանք չենք գործադրել, որ հաղթանակը մոտեցնենք մեզ, ոչ թե պարտությունը: 98 թվականից ի վեր դիվանագիտական և պաշտպանական ճակատում պորտաբուծությամբ ոռոգել ենք այս պարտությունը»,- նշեց Բաբաջանյանը:
Մանրամասն՝ տեսանյութում: