Նախօրեին վարչապետը հանդիպում ունեցավ իրավապահ մարմինների ներկայացուցիչների հետ, որին ներկա էին նաև դատավորներ։ Հանդիպման ժամանակ քննարկվեց զանգվածային անկարգություններ կազմակերպելու կամ դրանց մասնակցելու մեջ մեղադրվող անձանց խափանման միջոցների հարցը։
Արդյոք սա միջամտությո՞ւն է դատական համակարգին, արդարադատության իրականացման․ «Առաջին լրատվական»-ի հարցին իրավապաշտպան Նինա Կարապետյանցը պատասխանեց․ «Թերևս, մեղքը էլի կբարդվի լրագրողների և այդ հարցը բարձրաձայնողների վրա, բայց այս իշխանությունն այդպես էլ չկարողացավ հասկանալ, որ կարիք չի լինի հրավիրել, զանգել, հարցեր ուղղել, ուղիղ հանդիպումներ նշանակել, եթե լինի այդ ոչ բարով-խերով լյուստրացիան, վեթինգը, համակարգի մաքրումն ու իրական բարեփոխումը։ Իրեն հեղափոխական համարող իշխանությունը հմտություն ունեցավ անել ավելին, քան անում էր հանցավոր ռեժիմը։ Հանցավոր ռեժիմը գոնե գաղտագողի զանգում ու հրահանգներ էր տալիս, իսկ հիմա հրավիրում են ինչ-որ կոնկրետ գործի շուրջ, կամ կոնկրետ իրավիճակների շուրջ ինչ-որ հարցեր քննարկելու։ Ի՞նչ գործ ունի վարչապետը, որ դատավորներին հրավիրում է հանդիպման, ի՞նչ ակնկալիքներ ուներ նա, անկեղծորեն չեմ պատկերացնում»։
Երբ անհրաժեշտ էր բացառապես օրինական ճանապարհով արմատական փոփոխություններ իրականացվեր դատական համակարգում, չարվեց, ինչո՞ւ․ «Առաջին լրատվական»-ի հարցին փաստաբան Արա Ղարագյոզյանը պատասխանեց․ «Այդ հարցը լավ կլինի իշխանություններին տալ, որովհետև վերջին 2,5 տարվա ընթացքում մենք անընդհատ բարձրաձայնել ենք այդ հարցը։ Օրինակ՝ ես շփվելով իրավապահ ու արդարադատական համակարգի հետ, տեսնում եմ, որ այնտեղ որոշումների կայացման գծով կա անարդարություն։ Նույն Մարտի 1-ի գործով բուն դատավարությանը չհասանք։ Երբ հեղափոխություն եղավ, նույն վարչապետը հայտարարեց, որ այլևս Հայաստանում պետք է բռնություն չլինի, ոստիկանական ու դատական համակարգը պետք է լինի անկախ, բայց մենք տեսնում ենք, որ իրականում, ցավոք սրտի, այս վերջին 2,5 տարվա ընթացքում ինչ խոշտանգումներ, անմարդկային վերաբերմունքներ տեսանք, և էական չէ՝ այդ անձինք հասարակության կողմից ընդունվա՞ծ էին, թե՞ ոչ»։
Մանրամասները՝ տեսանյութում։
