Ադրբեջանի նախագահ Իլհամ Ալիևն առաջարկել է Նախիջևանը երկրի արևմտյան հատվածի հետ կապող միջանցք ստեղծել, հաղորդում է «ՌԻԱ Նովոստի»-ն:
Նախիջևանի ինքնավար հանրապետությունը պատկանում է Ադրբեջանին, սակայն բաժանված է դրանից Հայաստանի տարածքով:
«Մենք դուրս ենք բերում Նախիջևանը շրջափակումից, միևնույն ժամանակ բացելով նոր տրանսպորտային զարկերակ: Կարող եմ ասել, որ դրանից միայն կշահեն բոլոր երկրները»,- ասել է Ալիևը ժողովրդին ուղղված իր ուղերձում:
Նա հավելել է, որ Ռուսաստանը, Թուրքիան, Իրանը և Հայաստանը կկարողանան միանալ նոր միջանցքին:
«Այսպիսով, տարածաշրջանում կարող է ստեղծվել հնգակողմ համագործակցության նոր պլատֆորմ: Ես այդ գաղափարը արդեն հայտնել եմ Ռուսաստանի և Թուրքիայի նախագահներին: Ռեջեփ Թայիփ Էրդողանը և Վլադիմիր Պուտինը դրան դրականորեն են արձագանքել: Սա մեր առաջարկն է: Մենք ուզում ենք, որ տարածաշրջանում երկարաժամկետ խաղաղություն հաստատվի»,- շեշտել է նախագահը:
Ալիևը ցանկանում է նաև Լաչինի նոր միջանցք ստեղծել: Ներկայիս միջանցքը միացնում է Երևանն ու Ստեփանակերտը և, ի թիվս այլ քաղաքների, անցնում է Լաչինով: Ադրբեջանի ղեկավարը ցանկանում է, որպեսզի Լաչինն անցնի Բաքվին, իսկ միջանցքն անցնի այլ տարածքներով: