«ԿԽՄԿ-ն մարդասիրական այն կազմակերպությունն է, որն իր գործունեությունն է ծավալում զինված ընդհարումների ժամանակ: Եվ ռազմագերիների խնդիրը այդ ռազմական ընդհարումների ժամանակ առաջացած մարդասիրական խնդիրներից մեկն է»,- «Առաջին լրատվական»-ի հետ զրույցում ասաց Կարմիր խաչի միջազգային կոմիտեի արցախյան առաքելության խոսնակ Էթերի Մուսայելյանը՝ պատասխանելով մեր հարցին, թե որ դեպքում է ԿԽՄԿ-ն ներգրավվում գերիների վերադարձի աշխատանքում:
Մեր զրուցակցի խոսքով՝ իրենք մշտական երկխոսության մեջ են կողմերի հետ գերեվարվածների մասին տեղեկություն ստանալու նպատակով. «Մեր նպատակն է այցելել և գրանցել այդ մարդկանց, մենք չենք կարող ստիպել, որ գերեվարվածին ազատ արձակեն: Երբ կողմերը որոշում են կայացնում, մենք ընդամենը օգնում ենք կազմակերպելու այդ վերադարձի գործընթացը»:
Էթերի Մուսայելյանն ընդգծեց, որ ԿԽՄԿ-ն և Երևանում, և Բաքվում գերեվարված մարդկանց պարբերաբար այցելելու հնարավորություն ունեցել է. «Մենք այցելել ենք նրանց, ում մասին մեզ տեղեկացրել են, դրա համար կողմերին կոչ ենք անում իրականացնել իրենց ստանձնած պարտավորությունները և ԿԽՄԿ-ին հայտնել բոլոր այն մարդկանց անունները, ովքեր գտնվում են իրենց իշխանության ներքո»:
Մանրամասն՝ տեսանյութում: