«Նա առաջին միջուկային ֆիզիկոսը չէ, որ սպանվում կամ առևանգվում է Իրանում կամ արտասահմանում: Եվ առաջին անգամ չէ, որ Իրանը դրանում մեղադրում է Իսրայելին, չնայած հնարավոր է, որ դա հիմնավոր է: Սա մեկ անգամ ևս ապացուցում է, թե որքան սերտ են հարաբերությունները Իսրայելի և Ադրբեջանի միջև, քանի որ այդ գործողությունների մեծ մասը տեղի է ունենում Ադրբեջանի տարածքն օգտագործելով»,- «Առաջին լրատվական»-ի հետ զրույցում նշեց հայտնի բլոգեր Ալեքսանդր Լապշինը՝ անդրադառնալով Իրանում միջուկային ֆիզիկոս Մոհսեն Ֆախրիզադեի սպանությանը:
Նրա խոսքով՝ այս դեպքը ցույց է տալիս, որ տարածաշրջանում հակամարտությունն ավարտված չէ, և հնարավոր է այն շարունակվի անմիջապես Իրանում:
Անդրադառնալով արցախյան պատերազմին՝ Լապշինը նկատեց. «Իմ կարծիքով՝ այս պատերազմում նախևառաջ շահել է Ռուսաստանի Դաշնությունը, երկրորդ հերթին՝ Թուրքիան, որն այս պատերազմի շնորհիվ ամրապնդեց իր դիրքերը: Պատերազմում առաջին հերթին պարտվեց Հայաստանի Հանրապետությունը, պարտվեց նաև Ադրբեջանը, որովհետև Ադրբեջանը հաղթեց՝ կորցնելով իր ինքնիշխանությունը. 1993 թվականից հետո առաջին անգամ Ադրբեջանի տարածք վերադարձան ռուսական զորքերը»:
Նա ընդգծեց, որ խաղաղապահական առաքելությունը հանկարծակի ընդլայնվեց. «Այնտեղ են հայտնվել նաև տանկեր, հակահրթիռային համակարգեր: Բայց ես կարծում եմ, որ խնդիրը հայ բնակչության շահերի սպասարկումը չէ, այլ առաջին հերթին Ռուսաստանն իր դիրքերն է ամրապնդում տարածաշրջանում»:
Մանրամասն՝ տեսանյութում:
