Իրանի արտգործնախարար Մոհամադ Ջավադ Զարիֆը հեռախոսազրույցներ է ունեցել Ադրբեջանի և Իրաքի գործընկերներ Ջեյհուն Բայրամովի և Ֆուադ Հուսեյնի հետ: Այս մասին հաղորդվում է Իրանի ԱԳՆ կայքում:
Բանակցությունների ընթացքում նախարարը քննարկել է երկրի Պաշտպանության նախարարությանն առընթեր հետազոտությունների և նորարարությունների կազմակերպության ղեկավար Մոհսեն Ֆահրիզադեի սպանությունը:
«Հուսեյնը դատապարտել է Ֆահրիզադեի դեմ ահաբեկչությունը՝ իր կառավարության խորին ցավակցությունը հայտնելով մեր երկրի կառավարությանը և ժողովրդին», – ասված է հայտարարության մեջ:
Բայրամովը նույնպես դատապարտել է միջադեպը և սպանությունն անվանել անմարդկային:
Ավելի վաղ հայտնի էր դարձել, որ Թեհրանի մերձակայքում կատարված մահափորձի արդյունքում սպանվել էր միջուկային ֆիզիկոս, Իրանի Պաշտպանության նախարարությանն առընթեր հետազոտական և նորարարական կազմակերպության ղեկավար Մոհսեն Ֆահրիզադեն, ով, ենթադրաբար, երկրի ռազմական միջուկային ծրագրի մշակողներից մեկն էր՝ մինչ դրա լուծարումը 2000-ականներին: