Արմավիրի նախկին մարզպետի խորհրդական Մանուկ Սիմոնյանի սպանության մեջ մեղադրվող նրա կինը՝ Ռուզաննա Մկրտչյանը, օրերս ազատ է արձակվել։
Ռուզաննա Մկրտչյանի պաշտպան Նաիրա Պետրոսյանը «Առաջին լրատվական»-ի հետ զրույցում հաստատեց տեղեկությունը՝ նշելով, որ իր պաշտպանյալը ազատ է արձակվել նոյեմբերի 9-ին 1 միլիոն դրամ գրավի դիմաց։
Հիշեցնենք, որ Մանուկ Սիմոնյանի կինը՝ Ռուզաննա Մկրտչյանը, մեղադրվում է ամուսնուն սպանելու մեջ: Նրան մեղադրանք է առաջադրվել ՀՀ Քրեական օրենսգրքի 104-րդ հոդվածի 1-ին մասով՝ որպես խափանման միջոց ի սկզբանե ընտրվել էր կալանավորումը:
Մանուկ Սիմոնյանի եղբայրը՝ Արամ Սիմոնյանը, դատարանի այս որոշումը խայտառակություն է որակում։ «Չնայած արդեն ոչ մի բանի վրա չեմ զարմանում։ Ոտքից գլուխ բոլորը դավաճաններ են։ Ես Հայաստանի դատական համակարգի վրա այլևս չեմ զարմանում։ Բոլոր մարդասպանները աստիճանաբար հայտնվում են ազատության մեջ։ Հայրասպանին ազատության մեջ թողնողները պատերազմ էլ կպարտվեն, ամեն ինչ էլ կանեն»,- ասաց Սիմոնյանը՝ հավելելով, որ նոր է իմացել այս որոշման մասին, երբ պատահաբար Ռուզաննային ու նրա որդուն, որը ևս իր եղբոր սպանության հանցակիցներից է, տեսել են միասին, դրսում։ Սիմոնյանն ասաց, որ անպայման բողոքարկելու է գրավով Ռուզաննա Մկրտչյանին ազատ արձակելու որոշումը։ «Ես թույլ չեմ տա, որ այս խայտառակությունն այսպես ավարտվի։ Իմ եղբոր սպանությունը չի կարող այսպես կոծկվել գնալ։ Ես դա թույլ չեմ տա»,-եզրափակեց Արամ Սիմոնյանը։
Հիշեցնենք, որ սպանությունից հետո նշանակված դատահոգեբանական փորձաքննության արդյունքում հաստատվել էր, որ Ռուզաննա Մկրտչյանը սպանությունը կատարելիս չի եղել աֆեկտի տակ։ Սակայն դեպքից մոտ մեկ տարի անց նրա պաշտպանի միջնորդությամբ նշանակվել էր կրկնակի դատահոգեբանական փորձաքննություն, որից հետո փորձաքննությունը հաստատված համարեց աֆեկտը։
