Հերթական բողոքի ակցիայի նախաշեմին անձնակազմի, հատուկ սարքավորումների, կալանավորների տեղափոխման մեքենաներ, ռազմական բեռնատարներ, ջրցաններ են բերվել Մինսկի կենտրոն: Հայտնում է ՏԱՍՍ-ը:
Շարասյունը դուրս եկավ Ուռուչյեի միկրոշրջանից, որտեղ գտնվում են ՆԳՆ զորքերի հատուկ նշանակության ջոկատները: Նշվում է, որ հատուկ տեխնիկա է շարժվում քաղաքի այլ հատվածներում:
Մինսկի կենտրոնում անվտանգության ուժերը օղակել են քաղաքի հիմնական հրապարակները:
Անկախության հրապարակի մոտակայքում կանգնած են հատուկ ջոկատայինների ավտոբուսներ, կալանվորների տեղափոխման մեքենաներ և ջրցաններ: Բացի դրանից, ՆԳՆ զինված աշխատակիցները կանգնած են «Մինսկ – Հերոս քաղաք» կոթողի առջև:
Նոյեմբերի 29-ի ցերեկը նախատեսվում է «Հարևանների երթ» բողոքի ակցիա: Ցուցարարները կհավաքվեն իրենց բակերում, ապա կշարժվեն դեպի տարածաշրջանային հավաքատեղիներ՝ ընդհանուր շարասյանը միանալու համար: