Նաթանզի միջուկային օբյեկտում կատարված դիվերսիայի և միջուկային ինժեներ Մոհսեն Ֆախրիզադեի սպանության հետևը նույն ուժերն են կանգնած: Այս մասին ասաց Իրանի ատոմային էներգիայի կազմակերպության պաշտոնական ներկայացուցիչ Բեհրուզ Քամալվանդին: Ըստ «ՌԻԱ Նովոստիի», Ֆախրիզադեի կարծիքով՝ այստեղ իր դերն ունի սիոնիստական ռեժիմը:
«Կարելի է ասել, որ Նաթանզի միջադեպի և վերջին իրադարձության հիմքում ընկած են նույն ուժերը: Ըստ ամենայնի, սիոնիստական ռեժիմն իր դերն ունի դրանում»,- ասել է նա:
Ավելի վաղ հայտնի էր դարձել, որ Թեհրանի մերձակայքում կատարված մահափորձի հետևանքով սպանվել է միջուկային ֆիզիկոս, Իրանի Պաշտպանության նախարարությանն առընթեր հետազոտական և նորարարական կազմակերպության ղեկավար Մոհսեն Ֆախրիզադեն, որը, ենթադրաբար, երկրի ռազմական միջուկային ծրագրի մշակողներից մեկն էր՝ մինչև 2000-ականներին դրա լուծարումը:
Ինչպես հաղորդում է New York Times-ը՝ վկայակոչելով աղբյուրներին, Իսրայելը հարձակվել է Նաթանզի իրանական միջուկային օբյեկտի վրա՝ իրականացնելով «դիվերսիա»: NYT-ը նշում է, որ չի կարող լիովին հաստատել միջադեպին իսրայելական կողմի մասնակցության մասին տեղեկությունները: Իսրայելցի պաշտոնյաները, ըստ թերթի, անորոշ մեկնաբանություններ են տվել, նաև մատնանշել «միջուկային զենքի՝ Իրանից եկող վտանգը»:
