Իսրայելի բնակավայրերի նախարար Ցախի Հանեգբին, որը վարչապետ Բենյամին Նեթանյահուի մտերիմն ու զինակիցն է, ասել է, որ «գաղափար չունի», թե ով է սպանել իրանցի միջուկային ֆիզիկոս Մոհսեն Ֆահրիզադեին, հաղորդում է ՏԱՍՍ-ը:
«Ես գաղափար չունեմ, թե ով է դա արել: Այնպես չէ, որ պատասխանատվության պատճառով չեմ կարող խոսել, իսկապես գաղափար չունեմ»,- ասաց նախարարը:
Իր հերթին, Իսրայելի վարչապետի գրասենյակը գործակալությանը հայտնել է, որ իրենք չեն մեկնաբանի գիտնականի մահը:
Ավելի վաղ հայտնի էր դարձել, որ Թեհրանի մերձակայքում կատարված մահափորձի հետևանքով սպանվել է միջուկային ֆիզիկոս, Իրանի Պաշտպանության նախարարությանն առընթեր հետազոտական և նորարարական կազմակերպության ղեկավար Մոհսեն Ֆահրիզադեն, որը, իբր, երկրի ռազմական միջուկային ծրագրի մշակողներից մեկն էր՝ մինչև դրա լուծարումը 2000-ականներին: