Օրերս Ֆրանսիայի Հանրապետության Սենատը «Լեռնային Ղարաբաղի Հանրապետության ճանաչման անհրաժեշտության մասին» բանաձևի նախագիծ ընդունեց 305 կողմ, 1 դեմ և 30 ձեռնպահ ձայներով: Այսօր, սակայն,
Ֆրանսիայի արտաքին գործերի նախարարությունը հայտարարել է, որ երկիրը չի ճանաչում Արցախի անկախությունը։ Այնուամենայնիվ, այս հայտարարությունը դեռ չի նշանակում, թե Ֆրանսիայի Ազգային ժողովի կողմից բանաձևը հավանության չի արժանանա։ Ըստ ամենայնի, ԱԺ նիստը կկայանա դեկտեմբերի երեքին։
Ֆրանսահայ գործարար Վալերի-Աշխեն Գործունյանը «Առաջին լրատվական»-ի հետ զրույցում նշեց, որ ԱԳ նախարարության հայտարարությունը դիվանագիտական ժեստ է, և չի բացառվում, որ Ազգային ժողովը նույնպես որոշի ճանաչել այն։
«Պառլամենտում պատգամավորներից շատերն իրենց շրջաններում ունեն հայ ընտրողներ, և հայկական լոբբին եթե այս անգամ էլ լավ աշխատեց, արդյունքը չի բացառվում, որ դրական լինի։ Այնպես որ, ԱԳ նախարարի ասածը դեռ որոշիչ չէ»,-ասաց նա։
Բացի այդ, այն հայերը, որոնք այս ընթացքում հանդիպել են Էմանուել Մակրոնին, հասկացել են, որ Մակրոնը կողմ է բանաձևին։ Կան, անշուշտ, պատգամավորներ, որոնք պրոթուրքական, պրոադրբեջանական դիրքորոշում ունեն, բայց նրանք մեծամասնություն չեն, և չի բացառվում, որ մեծամասնությունը կողմ քվեարկի։
Անդրադառնալով վարչապետ Փաշինյանի այն հայտարարությանը, որ Արցախի անկախության միջազգային ճանաչման համար ճիշտ ժամանակն է, Գործունյանը նշեց, որ եթե, օրինակ, Ֆրանսիան ընդունի բանաձևը, մյուս եվրոպական երկրներն էլ կընդունեն.«Եվ շատ լավ կլինի, որ առաջինը Ֆրանսիան ճանաչի, հոգնել ենք տխուր և վատ լուրերից, չնայած հույս չունեմ, որ այդ ճանաչումը շատ մեծ բան կփոխվի»,-հավելեց նա։ Սփյուռքահայերը, նրա խոսքով, վրդովված են եռակողմ հայտարարությունից։
«Ես ինձ նվաստացած եմ զգում։ Իմ ընկերը՝ Մոնթեն, գրավեց Քելբաջարը, այսօր այն այլևս չկա՚։ Եվ ես չես կարող չմտածել, որ հայրենիք եմ կորցրել։ Իրենք էլ զենք չունեին, գրավում էին ազերիների զենքերը, ինչո՞ւ, ինչպե՞ս եղավ, որ կորցրինք այս ամենը, ինչո՞ւ 43 օր մեզ հուսադրեցին, որ հաղում ենք։ Եվ հիմա ես այստեղ ինչքան ծանոթ հայ գիտեմ, մեկը չկա, որ չասի՝ գնացել էի դեղ առնեի, որ հանգստանայի, մարդիկ չեն կարողանում քնել։ Խոսքեր չկան»,-ասաց Գործունյանը՝ հավելելով, որ պետք է բացառել Հայաստանում ներքաղաքական բախումները։
«Ես անձամբ չեմ ուզում ներքաղաքական պատերազմ, բայց էթիկայի տեսակետից, եթե դու պատերազմ ես կորցնում, դու պետք է հրաժարական տաս, եթե ուրիշ հաշիվ չկա, թող նշի ժամկետներ վարչապետը, որ ժողովուրդը հանագստանա, որովհետև դու կորցրել ես, ահռելի մեղավոր են նաև Սերժն ու Քոչարյանը, բայց պետք չէ, որ նրանք հետ գան, միևնույն ժամանակ դու կորցրել ես և դու պետք է հրաժարական տաս։ Եվ նորմալ էր , որ Պաշտպանության նախարարը հրաժարական տվեց, աննորմալ կլիներ, եթե մնար, պետք է հարգել ժողովրդին»,-ասաց Գործունյանը՝ հավելելով, որ իր համար հայրենիքի և մոր կորուստը նույ կերպ ծանր էր։
«Մարդիկ կան, որ ինձ են դիմել, որ իրենց տղան անհետացել է, ինձ են դիմում, որ ես մի բան անեմ, և եթե ծանոթ ունեմ Կարմիր խաչում, դիմեմ։ Հարց է առաջանում՝ բա կառավարությունը ո՞ւր է, ինչ է անում։ Շատ եմ ցավում այն ընտանիքների համար, որ ոչ մի լուր չունեմ, պատկերացնում եմ նրանց վիճակը։ Ես չեմ իմանում Ռուսաստանի շահերը, Թուրքիայի խաղերը, մենք այս մեծ խաղերը չենք իմանում, Էրդողանը գժվել է, ըստ երևույթին, Պուտինը հոգնել է և նորից հայերին կուտեն։ Ես շատ տպավորված էի 25 տարի առաջ «Լը մոնդ»-ի մեջ գրված մի հադվածից, որտեղ հոդվածագիրը գրել էր, որ մի քանի տարի հետո Հայաստանից կմնա միայն Երևանը, 25 տարի իմ գլխում է մնացել, թե ինչու է նման բան գրել, և հիմա եմ սկսել մտածել գուցե նա ճիշտ էր, միայն Երևանը պետք է մնա։ Իրավիճակը սարսափելի է, բայց առաջին մեղավորը մենք են։ Որևէ մեկը մեզ պարտական չէ, մենք մեզ վրա պետք է հույս ունենանք»,-ասաց նա։
