Գրեթե չկա մի հայ՝ թե՛ Հայաստանում, թե՛ Հայաստանից դուրս, որ կորստի զգացում չունենա. ունեցել ենք հայրենիք, որը կորցրել ենք, և հիմա բոլորը փնտրտուքների մեջ են, թե ինչ ճանապարհ ընտրել՝ այս իրավիճակից նվազագույն վնասներով դուրս գալու համար: Այս մասին «Առաջին լրատվական»-ի հետ զրույցում ասաց երգիչ, երգահան Վահագն Ռաշը:
Անդրադառնալով դիտարկմանը, որ վարչապետին քննադատողների մեջ կան մարդիկ, որոնք ունեն քաղաքական նպատակներ, և կան մարդիկ, որոնք չունեն քաղաքական նպատակներ, նրանք կարծում են, որ վարչապետը պետք է հրաժարական տա, քանի որ պարտության սիմվոլն է, Վահագ Ռաշը նշեց, որի իր կարծիքով նույնպես վարչապետը պետք է հրաժարական տա, բայց ոչ հիմա, քանի որ այնպիսի իրավիճակ է, որ նույնիսկ նրա թիմում չկա իրեն փոխարինողը:
«Հայ ազգը հիմա լիդերի խնդիր ունի: Այս պատերազմում մենք պարտվել ենք. զորավարի բացակայություն կա: Մեր պատմության ամբողջ ընթացքում, եթե ունեցել ենք հզոր զորավար, ունեցել ենք նվաճումներ՝ թեկուզ փոքր, սկսած՝ Տիգրան Մեծից մինչև Վազգեն Սարգսյան: Այսինքն՝ կային պատերազմի սիմվոլներ, այս 44-օրյա պատերազմում մենք սիմվոլ չտեսանք և զորավարի խոսք չլսեցինք»,- ընդգծեց երգիչը՝ կարծիք հայտնելով, որ դա վճռորոշ դեր ունեցավ պատերազմի ելքի վրա:
Վահագ Ռաշի խոսքով՝ այսօր ոչ թե հրաժարական պահանջելն է կարևոր, այլ ելքեր առաջարկելը: «Հայ ժողովուրդը նմանվել է որբ երեխայի, որին ծնողները միայնակ թողել են անտառում. չենք հասկանում՝ որ կողմ գնալ, ինչ անել»,- նշեց երգիչը:
Մանրամասն՝ տեսանյութում: