«Ես միանշանակ միանում եմ խմբակցության պահանջին։ Ես ոնց կարող եմ ժողովրդի ու խմբակցության հետ չլինել։ Ժողովուրդը ինչ որ ասում է, ազգը, մեծամասնությունը ինչ որ ասում է, ես դրա կողմնակիցն եմ։ Ես ոնց կարող եմ մեծամասնության կողքին չլինել։ Ես միշտ եղել եմ մեծամասնության հետ և այդպես էլ ապրում եմ»,- «Առաջին լրատվական»-ի հետ զրույցում ասաց ԱԺ ԲՀԿ խմբակցության պատգամավոր Վարդան Ղուկասյանը՝ պատասխանելով հարցին՝ միանո՞ւմ է խմբակցության պատգամավորների՝ վարչապետ Նիկոլ Փաշինյանի հրաժարականի պահանջին, թե՞ ոչ։
Դուք ուզում եք ասել, որ ազգի մեծամասնությունը պահանջո՞ւմ է վարչապետի հրաժարականը՝ հարցրինք: «Միանշանակ։ Փողոցում էլ քիչ մարդ կա լոկ մի բանի համար, որ երբ երկու տարի առաջ դուրս եկան փողոց, էդ մարդկանց երեսից Նիկոլ Փաշինյանը եկավ, դարձավ երկրի վարչապետ։ Հիմա որ էդ մարդկանց տեսան, հավանական է կամաց-կամաց պակասեցին։ Բայց որ էդ մարդիկ չեն ընդունում Նիկոլ Փաշինյանին, դա փաստ է։ Ստեղ որոշակի մարդիկ կան, մեծամասնությանն էլ լավ գիտեք»,- ասաց Ղուկասյանը։
Մեր հարցին՝ վարչապետի հրաժարականին հասնելուց հետո ո՞ւմ է ուզում տեսնել վարչապետի պաշտոնում, ունի՞ վարչապետի իր թեկնածուն, Ղուկասյանը պատասխանեց. «Ոչ։ Ես հիմա պատրաստ չեմ այդ խոսքն ասելու»։
Դիտարկմանը՝ եթե միանում է իր խմբակցության առաջ քաշած պահանջին, ինչո՞ւ չի մասնակցում ակցիաներին, նա պատասխանեց. «Ես հիմա հիվանդ եմ, ամիսուկես է, երկու ամիս է՝ հիվանդ եմ, դուրս չեմ գալիս։ Հեռուստատեսությամբ եմ նայում»։
Պատերազմին է՞լ եք հեռուստատեսությամբ հետևել՝ հարցին Ղուկասյանը պատասխանեց. «Այո։ Մենք պատրաստվեցինք, որ գնանք, մարդ ուղարկեցինք 200 հոգի տղաներիս հետ, ամեն ինչ պատրաստել էինք, էսպես, բան, բայց ես հիվանդանոցում պառկած եմ եղել, նախ՝ Երևանում, հետո՝ Գյումրիում։ Նոր-նոր ոտքի եմ կանգնում։ Կորոնավիրուսով էի վարակվել։ Ոչ թե պահ էի մտել ու անունը դրել կորոնավիրուս, այլ իրոք հիվանդ էի ու մինչև այսօր»։
Լուսանկարը՝ Armeniasputnik-ի