«Պատերազմը վեր հանեց այն բոլոր խնդիրները, որոնք կային արտաքին քաղաքականության բազմաթիվ ոլորտներում: Մենք ունեինք ձևակերպված որոշակի հարաբերություններ արաբական երկրների հետ, որոնք թվում էին, թե բավարար էին, թվում էր՝ դրանցում հաշվի առնված են փոխադարձ շահերը և մի շարք այլ հանգամանքներ, որոնք պետք է աշխատեին այս օրերին: Բայց տեսանք, որ շատ մակերեսային է եղել այդ աշխատանքը, արաբական երկրներից շատ չեզոք դիրքորոշումներ եղան: Մեր դիսկուրսում խոսում էինք թուրք-ահաբեկչական տանդեմի դեմ պայքարելու մասին, իսկ այդ երկրների համար կոնֆլիկտը հա-ադրբեջանական է, իսկ Ադրբեջանն էլ գործընկեր է այդ երկրների համար: Այս տեսանկյունից պարզ է, որ բացթողումներ կային»,-«Առաջին լրատվական»-ի հետ զրույցում ասաց արաբագետ, ԵՊՀ Արևելագիտության ֆակուլտետի արաբագիտության բաժնի ղեկավար Հայկ Քոչարյանը:
Անդրադառնալով ՀՀ նախագահ Արմեն Սարգսյանի՝ Արաբական Միացյալ Էմիություններ և Հոդանան այցերին, մեր զրուցակիցը նշեց, որ այդ այցերը պետք է դիտարկել տեղի ունեցող փոփոխությունների համատեքստում: «Նախագահի այցի ժամանակ Հորդանանի ԱԳ նախարարը հեռախոսազրույց է ունեցել Լավրովի հետ, նույն ժամին, նույն պահին, քննարկվել է ղարաբաղյան հակամարտությունը, ինչը թույլ է տալիս մտածելու, որ ռազմաճակատի խնդիրները եղել են առանցքային: Այստեղ կարևոր է նաև այցն ԱՄԷ, որտեղ հանդիպում եղավ թագաժառանգի հետ, որը ոչ ֆորմալ համարվում է երկրի ղեկավար և շատ ազդեցիկ դեմք է տարածաշրջանում»:
Խոսելով Ադրբեջանի վերահսկողության տակ գտնվող Արցախի շրջանները սիրիացի զինյալներով բնակեցնելու Թուրքիայի ծրագրերի մասին՝ Քոչարյանն ասաց, որ խոսքը հիմնականում հարավային շրջանների մասին է: «Լուրջ անվտանգության հարց է հենց Իրանի, ինչպես նաև մեր Զանգեզուրի համար: Եթե այդ զինյալները գան, գալու են ընտանիքներով, նրանք կռվող են, վերջին տաս տարում զբաղված են եղել դրանով, նրանք ծառայություն են մատուցելու այն ուժերին, որոնք իրենց կվարձեն՝ կլինի Ադրբեջանը, Թուրքիան, թե երրորդ այլ ուժ: Պետք է այսօրվանից աշխատել այդ ուղղությամբ և վերահսկել նրանց տեղաշարժը»:
Առավել մանրամասն՝ տեսանյութում:
