Այս գործընթացը շատ ավելի վաղ է սկսվել, ոչ թե սեպտեմբերի 27-ին, և գալու էր մի պահ, որ այս ամենը վերջանալու էր մեզ համար լավ կամ վատ, ցավոք մեզ համար այն ավարտվեց այս փուլում ողբերգական: 22 տարի մեր բոլոր ղեկավարները՝ 1998թ. հետո քաջություն չունեցան ժողովրդի հետ անկեղծ խոսելու, ոչինչ չարեցին կոնֆլիկտի էության մեջ պարզաբանելու ուղղությամբ: Բնականաբար սա օրվա քաղաքական իշխանությանը չի ազատում պատասխանատվությունից և այն ծանրագույն մեղքից, որը գործել է: Այս մասին «Առաջին լրատվական»-ի հետ զրույցում ասաց պատմաբան Վահրամ Թոքմաջյանը՝ հավելելով, որ չի պատկերացնում, թե ինչպես պետք է հաղթահարենք այս դժվարին փուլը:
«Տպավորություն է, թե իշխանությունը չի գիտակցել վնասի ողբերգության ծավալը: Պետական բոլոր օղակների վիճակը «խոր փոսի մեջ» է: ՇՇմած են, չեն հասկանում՝ ինչ է կատարվում: Մեխանիզմի աշխատեցնելու, գոնե այս պահին խնդիրները լուծելու հնարավորությունը կարծես չկա: Այդ բեռը իրենց իշխանության վրա կրկնակի պիտի լիներ՝ և՛ օրվա պատասխանատուն են իրենք, և՛ հետևանքների վերացման պատասխանատուն, բայց մենք դա չենք տեսնում: Ունենք դժգույն, պարտության բեռը ուսերին, հետևանքների մասին պատկերացում չունեցող, հուսալքված մարդկանց խումբ, և սա փոխանցվում է բոլոր օղակներին»,- նշեց Թոքմաջյանը:
«Գերիների վերադարձի, զոհված, անհետ կորած զինծառայողների դիերը գտնելու հարցը պետք է առաջնային լուծել, ամեն օր ահազանգեր են գալիս Արցախի ՄՕԲ ռեսուրսի տղաների հետ կապված, բանակի վերադասավորումների հետ կապված, արցախցի գաղթականների հետ կապված, որոնք տուն ու տեղ են կորցրել. այս հարցելը լուծել է պետք,- նշեց պատմաբանը՝ նկատելով, որ այս 30 տարիներին մեր պետությունը երբևէ չի եղել այսքան ծայրահեղ ճգնաժամային վիճակում:
Մանրամասն՝ տեսանյութում:
