Եվրախորհրդարանը (ԵԽ) բանաձև է ընդունել, որով Եվրամիության անդամ երկրներին կոչ է անում խստորեն պատժամիջոցներ կիրառել Թուրքիայի դեմ Միջերկրական ծովում նրա պահվածքի համար:
Փաստաթղթի քվեարկությունը տեղի է ունեցել հինգշաբթի օրը Բրյուսելում կայացած ԵԽ լիագումար նիստում:
Բանաձևին կողմ է քվեարկել 631 պատգամավոր, դեմ՝ 3: … «Եվրախորհրդարանականները Եվրախորհրդին կոչ են անում պահպանել միասնական դիրքորոշում Թուրքիայի անօրինական գործողությունների վերաբերյալ և ի պատասխան՝ կոշտ պատժամիջոցներ կիրառել», – ասվում է փաստաթղթում:
Նշվում է, որ Կիպրոսի գրավյալ մասում գտնվող Ֆամագուստա Վարոշայի նախկին առողջարանային գոտին «բացելու» Թուրքիայի որոշումը խաթարում է Կիպրոսի խնդրի համապարփակ լուծման հեռանկարները: «Եվրախորհրդարանականները Թուրքիային կոչ են անում Վարոշան տեղափոխել ՄԱԿ-ի ժամանակավոր կառավարման ներքո գտնվող իր օրինական բնակիչներին (համաձայն ՄԱԿ-ի Անվտանգության խորհրդի 550 (1984 թ.) Բանաձևի) և ձեռնպահ մնալ գործողություններից, որոնք փոխում են կղզու ժողովրդագրական հավասարակշռությունը ապօրինի վերաբնակեցման քաղաքականության միջոցով», – ասվում է փաստաթղթում:
Բացի այդ, բանաձևում նշվում է, որ Եվրամիության և Թուրքիայի հարաբերությունները հասել են «պատմական նվազագույնի»՝ Միջերկրական ծովում, Լիբիայում, Սիրիայում Անկարայի գործողությունների, ինչպես նաև «Լեռնային Ղարաբաղի հակամարտությունում Ադրբեջանին անմիջական աջակցության» պատճառով: «Քանի որ Թուրքիան ավելի ու ավելի է հեռանում եվրոպական արժեքներից և ստանդարտներից, ԵՄ-ի և Թուրքիայի հարաբերությունները բոլոր ժամանակներում ամենացածր մակարդակի վրա են: Նրա անօրինական և միակողմանի ռազմական գործողությունը Արևելյան Միջերկրական ծովում ոտնձգություն է կատարում ԵՄ անդամ երկրների Հունաստանի և Կիպրոսի ինքնիշխանության նկատմամբ: Եվրախորհրդարանականները նաև մատնանշում են Թուրքիայի անմիաջական աջակցությունը Ադրբեջանին Լեռնային Ղարաբաղի հակամարտության գործում, ինչպես նաև նրա գործողությունները Լիբիայում և Սիրիայում», – ասվում է փաստաթղթում: