Ակնհայտ է, որ տնտեսությունը և պետական բյուջեն պատերազմից հետո այլ կառուցվածք են ունենալու: «Առաջին լրատվական»-ի հետ զրույցում այս մասին ասաց Աշխատանքի և սոցիալական հարցերի նորանշանակ նախարար Մեսրոպ Առաքելյանը:
«Հետպատերազմական իրավիճակում սոցիալական խնդիրները նոր թափ են ստացել: Մինչ այդ էլ Հայաստանում սոցիալական ոլորտի խնդիրները եղել են առաջնային, և հիմա ավելացել են ևս երկու նոր խումբ խնդիրներ՝ մասնավորապես՝ Արցախի մեր հայրենակիցների մի զգալի հատվածը դեռևս գտնվում է ՀՀ-ում, բացի դրանից՝ պատերազմի զոհերի ընտանիքների և վիրավորում ստացած, հաշմանդամություն ստացած զինծառայողներին անհրաժեշտ է աջակցություն ցուցաբերել. սոցիալական ոլորտում առաջնահերթություններից է նրանց սոցիալական աջակցություն ցուցաբերելը:
Այսօր արդեն գործարկվել է մեկ ծրագիր՝ Արցախում հաշվառված քաղաքացիներին միանվագ աջակցություն է ցուցաբերվում 68 հազար դրամի չափով, այսօրվանից վճարումները սկսվել են, այդ վճարումները կարող են ստանալ և՛ Հայաստանում, և՛ Արցախում՝ Հայփոստի և Արցախփոստի միջոցով: Հրատապ կարգով անհրաժեշտ է կարգավորել արցախցիների ֆինանսական և կեցության խնդիրները: Այս միջոցառումներն իրականացվում են Արցախի կառավարության հետ համագործակցելով: Նպատակ ունենք աջակցությունն ուղղել նաև դեպի Արցախի վերաբնակեցումը:
Աջակցության երկրորդ ծրագրով 300 հազար դրամ կտրամադրվի Արցախի այն բնակավայրերի բնակիչներին, որոնք կորցրել են իրենց բնակավայրերում ապրելու հնարավորությունը. այս պահին քննարկվում է նաև նրանց ժամանակավոր բնակության հարցը՝ Հայաստանում կամ Արցախում, նաև նախատեսվում են քննարկումներ վերաբնակեցման երկարաժամկետ համալիր ծրագրի շուրջ: Մինչև մշտական բնակավայրով ապահովելը, որևէ արցախցի չի մնա առանց կեցավայրի»,- նշեց Առաքելյանը:
Մանրամասները՝ տեսանյութում: