Վրաստանում կորոնավիրուսի տարածումը մոտեցել է պիկին։ Վերջին օրերին գրանցվում է 100 հազար բնակչի հաշվարկով կորոնավիրուսի նոր դեպքերի ամենամեծ թիվն աշխարհում։ Հիվանդությունների վերահսկման կենտրոնի ղեկավարի տեղակալ Պաատա Իմնաձեն ասել է, որ Վրաստանում իրականում օրական վարակվածների թիվը հասնում է 10 000-ի:
Ջավախքում պատկերը նույնպես մտահոգիչ է։ Ջավախքի հասարակական գործիչ Անդրանիկ Կարսլյանը «Առաջին լրատվական»-ի հետ զրույցում նշեց, որ վիճակագրություն, թե քանիսն է վարակված կորոնավիրուսով, չկա, բայց վիճակն առավել քան ծայրահեղ է։ «Չունենք համապատասխան կլինիկաներ, որտեղ ժողովուրդը կարող է գնալ, բուժում ստանալ։ Չկան մասնագետներ, որոնք կարող են կորոնավիրուսի բուժման գործով զբաղվել։ Մտահոգիչ են նաև կորոնավիրուսից մահվան դեպքերը։ Ունենք մասնագիտությամբ հայ բժիշկներ, որոնք էլ օգնում են, փորձում են խորհուրդներ տալ, նշանակումներ են անում, թե ինչ պետք է ստանան պացիենտները»,- ասաց Անդրանիկ Կարսլյանը։ Թթվածնային սարքերի հետ կապված խնդիրներ նույնպես առկա են։
«Պետք է գնանք հասնենք Թբիլիսի, բայց այնտեղ էլ մեզ շտապօգնությունը չի տանում, քանի որ հիվանդանոցներում տեղ չկա, բուժանձնակազմ չկա, մի խոսքով՝ սոսկալի վիճակ է»,- ասաց նա։
Վրաստանը, որը վիրուսի նախնական փուլում ամենալավն էր պաշտպանվել, հիմա գտնվում է ծայրահեղ վիճակում։ Ըստ մեր զրուցակցի՝ Վրաստանում կորոնավիրուսի տարածմանը նպաստել են խորհրդարանական ընտրությունները. «Եղան ընտրություններ, ժողովուրդը բարձիթողի վիճակում էր, դրա համար մինչև վերջ հնարավոր չեղավ կանխել վիրուսը»։
Վրաստանում ժամը 22.00-ից հետո կարանտինային ժամ է հայտարարված, փակվում են խանութները, ռեստորանները, չեն գործում տրանսպորտային միջոցները, փորձում են այս կերպ կանխել իրավիճակը, սակայն իրավիճակն անկառավարելի է։ Թեև իրավիճակը Վրաստանում կրիտիկական է, սակայն կառավարությունը չի գնա սահմանափակումների, համընդհանուր լոքդաուն չի լինի, քանի որ երկրի տնտեսության վրա առաջին սահմանափակումները հսկայական բեռ են ավելացրել, ուստի այս ճգնաժամին երկրորդ անգամ Վրաստանը չի դիմանա։ Եվ չի բացառվում, որ եթե նման սահմանափակումներ լինեն, դոլարն էլ ավելի արժևորվի. մեկ դոլարը հիսուն լարիին համարժեք դառնա։
