Ֆրանսիայի Սենատը այսօր Երևանի ժամանակով 19։30-ին քննարկելու է Լեռնային Ղարաբաղի Հանրապետությունը ճանաչելու անհրաժեշտության մասին բանաձևը:
Ֆրանսիական Վիեն քաղաքի փոխքաղաքապետ Լևոն Սաքունցը «Առաջին լրատվական»-ի հետ զրույցում նշեց, որ սպասումները դրական են, տրամաբանորեն պետք է որ բանաձևի ընդունման հետ կապված խնդիր չառաջանա, որովհետև ամենամեծ կուսակցությունը՝ Հանրապետական կուսակցությունը, Սենատում մեծամասնություն է, և հենց ինքն է նախաձեռնողը։ Բացի այդ, մյուս կուսակցությունների հետ էլ կա համաձայնություն, որ բանաձևը պետք է ընդունվի։
«Այսինքն՝ 95 տոկոս հավանականություն կա, որ բանաձևն առանց խնդրի կընդունվի, սակայն մինչև վերջին պահը չի բացառվում, որ առաջանա խնդիր, որովհետև մենք այստեղ ունենք դեմ աշխատող լոբբի, և կարող է խնդիր առաջանալ։ Հնարավոր է՝ ԱԳ նախարարը մի քիչ ավելի ճնշում գործադրի, միջամտեն նախագահը, վարչապետը և վերջին պահին խնդրեն Սենատին, որ բանաձևը, օրինակ, հետաձգվի, այսինքն՝ մինչև վերջին պահը կա այդ վտանգը, սակայն եթե մինչև 16։30-ը բանաձևը մտնի Սենատ, եթե թողնեն զուտ Սենատի կուսակցությունների վրա, նրանք կանցկացնեն։ Կոնկրետ խնդիր կա ԱԳ նախարարի հետ կապված»,- նշեց Սաքունցը։
Ֆրանսիայում ադրբեջանական և թուրքական լոբբիստական աշխատանքներն ընդդեմ այս քննարկումների թեև շատ են, բայց հայկական լոբբին ևս լավ է աշխատում, և հավանականությունը, որ կընդունվի բանաձևը, Սաքունցի խոսքով, շատ մեծ է: «Պետք է դրական տրամադրվենք, սենատորների հետ էլ տարբեր աշխատանքներ են իրականացվում, հայկական կողմից էլ աշխատանքներ են իրականացնում, տեսնենք՝ ինչ կստացվի»,- հավելեց նա։
ԱԳ նախկին նախարար Էդվարդ Նալբանդյանն էլ անդրադարձել էր այսօր Սենատի կողմից բանաձևի ընդունման հավանականությանը՝ նշելով, որ հավանականությունը շատ մեծ է, որ կընդունվի, քանի որ կա կոնսենսուս։
Հիշեցնենք, որ մինչ այս Արցախի անկախությունը ճանաչել են Ֆրանսիայի մի շարք քաղաքներ և արվարձաններ, նաև մայրաքաղաք Փարիզի քաղաքային կոմիտեն։