Դեմոկրատական կուսակցության թեկնածու Ջո Բայդենը դարձավ ԱՄՆ նախագահական ընտրությունների պատմության մեջ առաջինը, ում հաջողվեց 80 միլիոն ձայն հավաքել: Այս մասին վկայում են NBC հեռուստաալիքի հրապարակած հաշվարկները:
Հեռուստաալիքի տվյալներով՝ դեմոկրատը ստացել է 80.011.351 ձայն, իսկ հանրապետականների թեկնածու և ԱՄՆ գործող նախագահ Դոնալդ Թրամփի օգտին քվեարկել է 73.881.795 ընտրող: Մյուս թեկնածուները միասին ստացել են 2,867,515 ձայն:
Նոյեմբերի 3-ին ԱՄՆ-ում նախագահական ընտրություններ անցկացվեցին, պետության ղեկավարի պաշտոնի գլխավոր հավակնորդներն են դեմոկրատ Ջո Բայդենը և գործող նախագահ՝ հանրապետական Դոնալդ Թրամփը:
Նոյեմբերի 7-ին ամերիկյան առաջատար լրատվամիջոցները`ABC News, FOX News, CNN, AP և NBC, հայտարարեցին ԱՄՆ-ի նախագահական ընտրություններում ժողովրդավար Ջո Բայդենի հաղթանակի մասին: Արդյունքները դեռևս պաշտոնապես չեն հայտարարվել:
Համաշխարհային շատ առաջնորդներ շնորհավորանքներ են հղել Բայդենին, որոնց թվում են՝ Սաուդյան Արաբիայի թագավորը, ՄԱԿ-ի գլխավոր քարտուղարը, Թուրքիայի և Սլովենիայի նախագահները:
