Ֆրանսիան գտնում է, որ Լեռնային Ղարաբաղի հակամարտությունում հրադադարի համաձայնագրի իրագործումը պետք է տեղի ունենա միջազգային դիտորդության ներքո: Այս մասին օրերս հայտարարել են երկրի նախագահի աշխատակազմից:
Հայտարարությունը հնչել է Փարիզում մտահոգությունների ֆոնին, որ Ռուսաստանը և Թուրքիան կարող են համաձայնագիր կնքել՝ ապագա խաղաղ բանակցություններից արևմտյան երկրներին դուրս թողնելու նպատակով:
Մոսկվան, Վաշինգտոնի և Փարիզի հետ միասին, համանախագահում է ղարաբաղյան հակամարտության կարգավորման Մինսկի խումբը, բայց նրանք չեն մասնակցել Ռուսաստանի, Հայաստանի և Ադրբեջանի կողմից ստորագրված համաձայնագրի կնքմանը, որը կոչված է դադարեցնելու վեցշաբաթյա ռազմական գործողություններն այդ անկլավի շուրջ:
«Մենք ցանկանում ենք, որ Մինսկի խումբն իր դերը խաղա (հրադադարի ռեժիմը) դիտարկելու գործում»,- լրագրողներին ասել է Ֆրանսիայի նախագահի աշխատակազմի պաշտոնյան:
Աղբյուրը նշում է, որ Փարիզը պնդում է հրադադարի ռեժիմի «միջազգային դիտարկմանը»՝ փախստականների վերադարձն ապահովելու և հատկապես Սիրիայից օտարերկրյա գրոհայինների վերադարձը կազմակերպելու և Լեռնային Ղարաբաղի կարգավիճակի շուրջ բանակցություններ սկսելու համար:
«Մենք հասկանում ենք, որ ռուսական կողմը բանակցում է թուրքական կողմի հետ հնարավոր բանաձևի շուրջ, որը մենք չենք ցանկանում»,- ասել է պաշտոնյան: