ԱԺ պատգամավոր Արման Բաբաջանյանը ֆեյսբուքյան իր էջում գրել է.
Այսօր տեղեկացա, որ անհայտ կորած զինվորների ծնողները նախօրեին վարչապետի հետ հանդիպումից հետո, հույսները Հայաստանի պետական գերատեսչություններից կտրած, այսօր գնացել են Երևանում ՌԴ դեսպանատուն և օգնություն են խնդրել Ռուսաստանից՝ նամակ են գրել այդ երկրի նախագահ Պուտինին։
Այսօր ամենածանր, ամենալարված օջախը գերիների և դիերի փոխանակման, անհայտ կորածների գործերն են, որով ակնկալում էի, որ ՀՀ ԱԺ արտաքին հարաբերությունների հանձնաժողովը կոնկրետ քայլեր կձեռնարկի։
Մենք չենք կարող դատապարտել ՀՀ Արտաքին քաղաքական գերատեսչության տասնամյակների հանցավոր անգործությունը ու ոչինչ չանել։ ԱԺ պրոֆիլային հանձնաժողովը պարտավոր է այս հույժ կարևոր խնդրով 24-ժամյա աշխատանքային ռեժիմ սահմանել և աշխատել միջազգային բոլոր կառույցների, կազմակերպությունների, այլ երկրներում մեր դիվանագիտական ներկայացուցչությունների հետ։
Ինչի՞ համար են պետական ինստիտուտները, ո՞ր օրվա համար են մարդիկ խորհրդարանի պատգամավոր ընտրել։ Մինչև ե՞րբ է շարունակվելու այս պորտաբուծությունը։ Լավ, ինչո՞ւ են մարդիկ հարկ վճարում, ինչո՞ւ ենք մենք աշխատավարձ ստանում։