Ֆրանսիայի նախագահ Էմանուել Մակրոնը հայտարարել է, որ երկիրը հաղթահարել է կորոնավիրուսի երկրորդ ալիքի գագաթնակետը, գրում է «ՌԻԱ Նովոստի»-ն:
Նախագահը շեշտել է, որ նոյեմբերի 28-ից սահմանափակումները կմեղմվեն: Ֆրանսիացիները կկարողանան զբոսնել տանից 20 կմ հեռավորության վրա՝ 3 ժամ: Բացի այդ, դպրոցականները կկարողանան պարապել դրսում, իսկ խանութները բաց կլինեն մինչև երեկոյան ինը:
Նոյեմբերի 23-ին Ֆրանսիայում կորոնավիրուսով վարակվել է 9155 մարդ, նոյեմբերի 22-ին՝ 13.157, նոյեմբերի 21-ին՝ 17.680 մարդ: Ընդհանուր առմամբ, երկրում հիվանդացել է 2.195.940 մարդ, մահացել է 49.312 մարդ:
Համավարակի սկզբից մինչ օրս աշխարհում գրանցվել է կորոնավիրուսով վարակման 59 միլիոն դեպք, ապաքինվել է 41 միլիոն մարդ, մահացել է ավելի քան 1.4 միլիոն մարդ: