Դեկտեմբերի 7-ին Ցյուրիխում տեղի կունենա 2022 թվականի ֆուտբոլի աշխարհի առաջնության ընտրական փուլի եվրոպական գոտու վիճակահանությունը: ՈՒԵՖԱ-ի անդամ 55 երկրները կբաժանվեն 10 ընտրական խմբերի միջև, որոնցից հինգում հանդես կգան 5-ական, իսկ մյուս հինգում՝ 6-ական թիմ: Խմբերի հաղթողներն անմիջապես կմտնեն աշխարհի առաջնության եզրափակիչ փուլ: Երկրորդ տեղերը գրաված հավաքականները, ինչպես նաև 2020թ. ՈՒԵՖԱ-ի Ազգերի լիգայի լավագույն երկու հավաքականները, որոնք աշխարհի առաջնության ընտրական խմբերում չեն զբաղեցնի առաջին երկու տեղերը, անցումային խաղերում կորոշեն մնացած երեք ուղեգրերի տերերին:
Նախօրեին ՖԻՖԱ-ն հրապարակել էր վիճակահանության զամբյուղները, որոնք կազմվել են ըստ հավաքականների վարկանիշի։ Հայաստանի հավաքականը հայտնվել է 5-րդ զամբյուղում Կիպրոսի, Ֆարերյան կղզիների, Ադրբեջանի, Էստոնիայի, Ղազախստանի, Կոսովոյի, Լիտվայի, Լատվիայի և Անդորրայի հավաքականների հետ միասին։ Սա նշանակում է, որ վիճակահանության արդյունքներով թվարկված հավաքականներից ոչ մեկը մերոնց բաժին չի հասնի։
Առաջին զամբյուղում տեղ են գտել Բելգիայի, Ֆրանսիայի, Անգլիայի, Պորտուգալիայի, Իսպանիայի, Իտալիայի, Խորվաթիայի, Դանիայի, Գերմանիայի, Նիդեռլանդների ազգային թիմերը։ Երկրորդ զամբյուղում են Շվեյցարիան, Ուելսը, Լեհաստանը, Շվեդիան, Ավստրիան, Ուկրաինան, Սերբիան, Թուրքիան, Սլովակիան և Ռումինիան։ Երրորդ զամբյուղում ընդգրկված են Ռուսաստանը, Իռլանդիան, Չեխիան, Նորվեգիան, Հյուսիսային Իռլանդիան, Հունգարիան, Իսլանդիան, Շոտլանդիան, Հունաստանն ու Ֆինլանդիան։ 4-րդ զամբյուղում տեղ են գտել Բոսնիա և Հերցեգովինան, Բելառուսը, Մոնտենեգրոն, Հյուսիսային Մակեդոնիան, Ալբանիան, Բուլղարիան, Իսրայելը, Սլովենիան, Լյուքսեմբուրգը, Վրաստանը։ Վերջապես ամենացածր՝ 6-րդ զամբյուղում են Մալթան, Լիխտենշտեյնը, Մոլդովան, Ջիբրալթարը և Սան Մարինոն։
Չնայած ՖԻՖԱ-ն դեռ պաշտոնապես չի հրապարակել նոյեմբերի դասակարգման աղյուսակը, այնուամենայնիվ կազմված զամբյուղները վկայում են, որ Ազգերի լիգայի խաղարկությունում մեր հավաքականի տարած վերջին հաղթանակները էապես չեն ազդել վարկանիշի վրա։ Ավելի ստույգ, եթե ՖԻՖԱ-ի հրապարակած վերջին վարկանիշային աղյուսակում Հայաստանի հավաքականը 101-րդն էր, ապա այս պահին 99-րդն է։ Փաստորեն Վրաստանի և Հյուսիսային Մակեդոնիայի հավաքականների նկատմամբ տարած հաղթանակների արդյունքում մերոնք առաջադիմել են ընդամենը երկու հորիզոնականով։ Այս հաշվարկում առաջընթաց ունենալու համար անհրաժեշտ են կայուն ելույթներ գոնե մեկ տարվա կտրվածքով։ Նույն Վրաստանի ազգային հավաքականը, որը Ազգերի լիգայի խաղարկությունում բավարարվեց միայն 3-րդ հորիզոնականով, գտնվում է ավելի բարենպաստ՝ 4-րդ զամբյուղում։
Հիշեցնենք, որ Ազգերի լիգայի խաղարկությունում մեր հավաքականը, հաղթելով C դիվիզիոնի 2-րդ ենթախմբում, ձեռք բերեց B դիվիզիոնում խաղալու իրավունք։ Այս մրցաշարում Հայաստանի հավաքականը գերազանցում է այնպիսի հավաքականների, ինչպիսիք են Թուրքիան, Սլովակիան, Բուլղարիան, բայց… Եթե աշխարհի առաջնության ընտրական փուլում Հայաստանի հավաքականն ընդգրկվի 5 հավաքականներից կազմված ենթախմբում, մենք կունենանք ամենացածր վարկանիշը։ 6 հավաքականներից կազմված խմբում ընդգրկվելու պարագայում մեզ բաժին կհասնի կարգով ավելի ցածր մրցակից 6-րդ զամբյուղից։ Փաստ է, որ առաջիկա մրցաշարը մեզ համար բավական բարդ է լինելու։
Ինչ խոսք, վիճակահանությունից շատ բան է կախված, բայց մեծ հաշվով աշխարհի առաջնության ընտրական փուլում բարձր արդյունք գրանցելու համար անհրաժեշտ է լինելու հաղթել բարձրակարգ՝ այդ թվում նաև թոփ հավաքականների։
Ազգերի լիգայի խաղարկությունը մեզ համար ինդիկատոր էր՝ պարզելու համար հավաքականի իրական ներուժը։ Վերջին հանդիպումները ցույց տվեցին, որ Խոակին Կապառոսին հաջողվել է ձևավորել մարտունակ կոլեկտիվ, որը, կարծում ենք, կկարողանա արժանի պայքար մղել։ Հիշեցնենք, որ 2020 թվականին Եվրոպայի առաջնության ընտրական փուլում 10 խաղում մերոնք տարան 3 հաղթանակ, մեկ հանդիպում ավարտեցին ոչ-ոքի և կրեցին 6 պարտություն՝ ենթախմբում զբաղեցնելով նախավերջին՝ 5-րդ հորիզոնականը: Եղավ մի պահ, երբ մեր ընտրանին իրական հնարավորություն ուներ երկրորդ հորիզոնականի համար պայքարելու, բայց անցյալ տարվա հոկտեմբերին Լիխտենշտեյնի և Ֆինլանդիայի դեմ մրցավեճերում ձախողվեցինք։ Հիմա կարծես ունենք նոր՝ բալանսավորված հավաքական։
2022 թվականի աշխարհի առաջնության ընտրական փուլը կմեկնարկի գալիք տարվա մարտին։
