Ծանր օրեր ենք ապրում․ ներքաղաքական կյանքում և փոփոխություններ կան, և փոփոխություններ չկան։ Մի տեսակ տուրբուլենտ իրավիճակում ենք հայտնվել։ Դրան զուգահեռ վարչապետ Նիկոլ Փաշինյանը փոխում է կառավարության անդամներին՝ արտգործնախարար, պաշտպանության նախարար, սոցապնախարար, կրթության նախարար և այլն։ Այս փոփոխությունները ինչի՞ն են միտված՝ թուլացնելո՞ւ վարչապետի հրաժարականի պահանջը, թե՞ իսկապես ստեղծված իրավիճակում ավելի արդյունավետ գործելու համար։ Թեմայի շուրջ «Առաջին լրատվական»-ը զրուցել է քաղաքագետ Դավիթ Հովհաննիսյանի հետ:
«Եթե Նիկոլ Փաշինյանը կարծում է, որ ԿԳՄՍ նախարար Արայիկ Հարությունյանն է մեղավոր այս պարտության համար, կարող է նրան հեռացնել: Բայց ինձ թվում է՝ հանրությունն այդպես չի կարծում: Ինչքան էլ Արայիկ Հարությունյանն անհաջողակ նախարար էր, հաստատ նա չի մեղավորը»,- ասաց վերլուծաբանը:
Մեր զրուցակցի խոսքով՝ Նիկոլ Փաշինյանը, հայտարարելով, որ ինքն է այս պարտության գլխավոր պատասխանատուն, նախադասությունը կիսատ է թողել. «Դա պետք է ենթադրեր գործողություններ: Նմանատեպ աղետի համար, ինչի առջև մենք կանգնեցինք, պատասխանատվության միակ ձևը հեռացումն է իշխանությունից»:
Դավիթ Հովհաննիսյանը ընդգծեց՝ Նիկոլ Փաշինյանը հենց հիմա պետք է հայտարարի, որ ինքը պատրաստ է հրաժարական տալ. «Սակայն նա կտրված է իրականությունից: Նա ինքն իր համար մի ցանկալի իրողություն էր ստեղծել, որ կարող էր հաղթել այդ պատերազմում, և առանց ռեսուրսների ռեալ հաշվարկների գնացել էր պատերազմի՝ արհամարհելով բոլոր զեկույցները, ազդակները: Ինքը իր մեջ երևի հավատացել է, որ պետք է դառնա նոր Տիգրան Մեծ և հաշվի չի առել ոչինչ: Ես չեմ տեսնում այստեղ որևէ ադեկվատ հաշվարկ»:
Մեր դիտարկմանը, թե որ ուղղությամբ պետք է գնա հանրության ողջամիտ հատվածը, վերլուծաբանն ասաց. «Այդ 17 ուժերի հանրահավաքին երբեք մարդ չի գնա, նույնիսկ ամենաանհավանական արհավիրքները եթե պատահեն Հայաստանին, որովհետև կոնկրետ այս հարցի դեպքում իրենք էլ են մեղավոր, և հետո այն օրակարգը, որ իրենք դրել են՝ «Նիկոլ, դավաճան», հասարակության ողջամիտ մասը չի կիսում»:
Մեր զրուցակիցը կարծում է, որ նոյեմբերի 9-ի ստորագրությունը եղել է Նիկոլ Փաշինյանի միակ ռացիոնալ քայլը ԼՂ հարցում այս ամբողջ 2.5 տարվա ընթացքում. «Նա այդ որոշմամբ փրկել է Արցախը ամբողջական կորստից: Դա մի բան էր, որ ինքը պետք է աներ պատերազմի երրորդ-չորրորդ օրը: Ուստի ողջամիտ մարդիկ հասկանում են, որ Նիկոլ Փաշինյանի սխալը ոչ թե այդ նվաստացուցիչ համաձայնագրի կնքումն էր, այլ այն, որ նա գնացել է արկածախնդրության ու անհեռանկարային որոշման և թույլ է տվել այդ պատերազմը: Նա դարձել էր ավելի հայդատական, քան հայդատականներն էին, ավելի դաշնակ, քան դաշնակներն էին»:
Վերլուծաբանը կարծում է, որ ազգային խայտառակություն է, որ չես կարողանում քո հարցերը լուծել դիվանագիտական ճանապարհով՝ ունենալով դրա համար բազմաթիվ գործիքներ, և որոշում ես մարդկանց տանել պատերազմի. «Լուծումը մեկն է՝ այս աղետի պատասխանատուն պետք է հեռանա, և ողջամիտ ժամկետներում պետք է նշանակվեն արտահերթ ընտրություններ»:
Մանրամասն` տեսանյութում: