Հայաստան-Ռուսաստան-Ադրբեջան եռակողմ փաստաթուղթը ամրագրում է նոր իրողություն, նոր ստատուս քվո: Ամփոփելով նոր իրողության ակնառու պարամետրերը՝ «Հանուն հանրապետության» կուսակցության ղեկավար մարմնի անդամ, քաղաքագետ Ռուբեն Մեհրաբյանը նշեց. «Դրանք ձևավորվեցին պատերազմի 44 օրերի ընթացքում և արդյունքում. Հայաստանը, հայկական բանակը, ՀՀ Զինված ուժերը կրեցին դաժան ռազմական պարտություն, բայց դա, այնուամենայնիվ, կապիտուլյացիա չէր: Սա Հայաստանի անցած 30-ամյա քաղաքական կուրսի պարտությունն էր, սա Ռուսաստանի դաշնակցի, ռուսական զենքի, ռուսական տեխնոլոգիաների պարտությունն էր, սա մեր քաղաքական դասի կրած մտածողության պարտությունն էր:
Այն, ինչ տեղի ունեցավ, էապես մեծացրեց Ռուսաստանի և Թուրքիայի նշանակությունը մեր տարածաշրջանում առնվազն կարճաժամկետ և միջնաժամկետ հեռանկարում: Արձանագրվեց, որ տեղի ունեցածը հնարավոր դարձավ, երբ Թրամփի վարչակարգը սկսեց աշխարհում վակուումներ ստեղծել, հատկապես Եվրաատլանտյան տարածաշրջանում, որի անբաժանելի մասն է նաև Կովկասյան տարածաշրջանը… Սա նաև Հայաստանի արտաքին քաղաքական կուրսի պարտությունն էր»:
Մեհրաբյանի խոսքով՝ ազնվորեն պետք է վերլուծություններ կատարվեն փորձագիտական, քաղաքական շրջանակներում, որպեսզի բանակում բացառվեն ճարպակալած առնետները, որոնք տասնամյակներով լափել են միջոցները, անվտանգության մասին մեր պատկերացումները պետք է ռեվիզիայի ենթարկվեն»,- ընդգծեց քաղաքագետը:
Անդրադառնալով ներքաղաքական զարգացումներին՝ Ռուբեն Մեհրաբյանը նկատեց. «Չքմեղանում են, դատախազական կեցվածքով կանգնել են և պարազիտանալով մարդկանց ցավի ու դժբախտությունների վրա՝ կոկորդ են պատռում և կուրծք են ծեծում՝ մտածելով, որ իրենց աստեղային ժամն է եկել: «Հրապարակն» այսօր ոչ միայն ասելիք չունի, այլ այն, ինչ անում է, դրանից անբարոյական բան չկա ուղղակի… »:
Քաղաքագետի դիտարկմամբ՝ այս պահին իշխանության հեռացումը քաոսի և հեղաշրջման դուռ կբացի:
Մանրամասն՝ տեսանյութում:
