Այն մարտահրավերները, որ այսօր կանգնած են հայ ժողովրդի առջև, անբնութագրելիորեն բարդ են և ծանր: Այսօր պետք է լծվել աշխատանքի, աշխատել երկակի, եռակի եռանդով, քանի որ պատմական ճամփաբաժանի առաջ ենք կանգնած: Եթե տանուլ տանք և ձախողենք, արդեն սեղանին է դրված ամեն ինչ: Այս մասին «Առաջին լրատվական»-ի հետ զրույցում ասաց Սփյուռքի գործերով գլխավոր հանձնակատար Զարեհ Սինանյանը:
Հարցին, թե ինչ աշխատանքներ են իրականացվում հետպատերազմական սթրեսը հաղթահարելու և նոր սայթաքումներ թույլ չտալու համար, Զարեհ Սինանյանը պատասխանեց, որ Սփյուռքի ավելի խոր ներգրավվածությամբ հնարավոր կլինի հասնել նպատակներին: «Այս պատերազմն ապացուցեց, որ Հայաստանը չունի մասնագիտական պրոֆեսիոնալ մենեջմենթի փորձ ունեցող ռեսուրսներ, ինչն անհրաժեշտ է երկիրը այն հիմքերի վրա կանգնեցնելու համար, որպեսզի հնարավոր լինի վերապրել: Սակայն, որպես ազգ, մենք ունենք այդ ռեսուրսը, բայց այն երկրից դուրս է գտնվում՝ պատմական պատճառներով՝ և՛ Ցեղասպանության, և՛ վերջին 30 տարվա ընթացքում «ուղեղների արտահոսքի» հետևանքով: Անհրաժեշտ է այդ ռեսուրսների ներգրավման ծրագրերն իրագործել: Պետությունը պետք է այդ ուղղությամբ քայլեր ձեռնարկի, օրենսդրական խոչընդոտներն օր առաջ պետք է վերացնել և հնարավորություն ստեղծել դրսից մասնագիտական փորձ ունեցող մարդկանց հրավիրելու և կառավարման համակարգի մեջ ներգրավելու համար»:
Սինանյանը նաև հավելեց, որ այս պահին հրաժարականներ են պահանջում, այդ թվում նաև իր հրաժարականը, ասելով, որ ինքը ասոցացվում է իշխանության հետ և պետք է հրաժարական տա. «Սակայն հրաժարական տալը հեշտ քայլ է, բայց անպատասխանատու»:
Մանրամասն՝ տեսանյութում:
