Լեռնային Ղարաբաղի, այն է՝ մեր համազգային հիմնախնդրի վերաբերյալ վերջին տասնամյակների զարգացումները և այդ զարգացումների շուրջ որոշում կայացնողների քաղաքական պատկերացումները և ամբողջական մոտեցումները ստեղծված իրավիճակին անհամարժեք էին, և արդյունքում տեղի ունեցավ այն, ինչ տեղի ունեցավ: Այս մասին «Առաջին լրատվական»-ի հետ զրույցում ասաց կառավարման փորձագետ Սերոբ Անտինյանը:
«Լեռնային Ղարաբաղի հիմնախնդիրը շոշափում է թե՛ տարածաշրջանային, թե՛ գլոբալ աշխարհաքաղաքական շահեր և հետաքրքրություններ: Այս տարածաշրջանով են անցնում բազմաթիվ էներգետիկ և տրանսպորտային կոմունիկացիաներ, այս տարածաշրջանը Մերձավոր Արևելքի հանգուցային կետերից է: Տևական ժամանակ մենք գործ ունեինք սառեցված հակամարտության հետ:
Ինչպես տեղի ունեցավ Հարավային Կովկասի անվտանգային համակարգի փլուզումը և ինչպես ստացվեց, որ Թուրքիան ակտիվ և ագրեսիվ կերպով ներխուժեց և իրականացրեց իր ծրագիրը, և ինչպես եղավ, որ մեր որոշում կայացնողները չկարողացան ո՛չ կանխատեսել նման սցենար, ո՛չ էլ արդյունավետ կերպով կանխել կամ գոնե հակազդել այս բոլոր զարգացումներին:
Տևական ժամանակ մենք ապրում էինք այն մտայնությամբ, որ ղարաբաղյան խնդրի սառեցված վիճակը կամ անվտանգային ստատուս քվոն ապահովվում է հայկական բանակի կողմից, դա այդպես էր, բայց մասամբ… Այս ողբերգական իրադարձությունը ցույց տվեց, որ մենք ի վիճակի չենք դիմակայելու թուրքական բանակին: Այսինքն՝ անվտանգային համակարգը Հարավային Կովկասում մեծամասամբ պայմանավորված էր աշխարհի ուժային կենտրոնների միջև առկա համաձայնությամբ՝ առ այն որ ղարաբաղյան հարցի լուծումը պետք է ընթանա բանակցային գործընթացի շրջանակներում…
Արցախյան հիմնախնդիրը կարգավորվեց ռուս-թուրքական պայմանավորվածությամբ՝ «2-2» ձևաչափով»,- նշեց Անտինյանը:
Մանրամասն՝ տեսանյութում: