Օրերս Ռուսաստանի արտգործնախարար Սերգեյ Լավրովը հայտարարել է, որ իրենք բոլոր ջանքերը կգործադրեն, որպեսզի նոյեմբերի 9-ին ստորագրված եռակողմ համաձայնագիրը որևէ դեպքում չվերանայվի։ Այս օրերին հայկական կողմից հիմնականում կարծիքներ են հնչում, որ փաստաթղթում կան կետեր, որոնք պարտադիր փոփոխման ենթակա են։
Ըստ ձեզ՝ Լավրովի երեկվա հայտարարությունն ինչի՞ մասին էր խոսում, արդյո՞ք հայկական կողմին զգուշացնում էր, որ զուր հույսեր չփայփայեն․ «Առաջին լրատվական»-ի հարցին քաղաքագետ Էդգար Վարդանյանը պատասխանեց․ «Դա կարելի է դիտարկել որպես մեսիջ, որն ուղված էր բոլոր խաղացողներին, այդ թվում՝ Մինսկի խմբի մյուս երկու համանախագահներին, որոնք վերջին շրջանում պարբերաբար ասում են, որ, ըստ էության, որոշակի պարզաբանումների կարիք կա այդ հայտարարության տեքստի հետ կապված։ Առնվազն երկու անգամ նույն Լավրովն ասել է՝ «Մինսկի խմբի մեր գործընկերները, կարծես թե, որոշակի նեղվածություն ունեն, որն անհիմն եմ ես համարում»։ Մինսկի խմբի մյուս երկու համանախագահներն ասել են, որ որոշակի պարզաբանումներ են ուզում, որին ի պատասխան Պեսկովն ասել է՝ եթե պարզաբանումներ պետք լինեն, ապա դրանք կտրվեն։ Բայց ակնհայտ է, որ այստեղ կան այսպես ասած՝ որոշակի կոմունիկացիոն խնդիրներ Մինսկի խմբի համանախագահների միջև։ Այո, ԱՄՆ-ի ու Ֆրանսիայի համանախագահների մոտ կան հարցեր, սակայն Լավրովն ուզեց հասկացնել, որ կոնկրետ տեքստի հետ կապված փոփոխություններ մի ակնկալեք՝ իրենք հակված չեն դրան»։
Մանրամասները՝ տեսանյութում։