Լուրեր
Հաջորդ պատերազմը շատ ավելի մոտ է. չպետք է պատրաստվենք խաղաղության
  • 16:17
  • 2020-11-20
  • Դիտումներ՝ *

«Պետք է արձանագրենք, որ պարտվել ենք ու պետք է այս պարտությունը և տեղի ունեցածը շատ ավելի լայն, պատմության համակարգային վերլուծության մեջ դիտարկենք: Պետք է արձանագրենք պարտությունը, շատ արագ վեր հանենք պատճառները, փորձենք վերացնել դրանք, դնել նոր նպատակներ, նոր ուղենիշեր, նոր կարգախոսեր, ընտրենք նոր անձինք, ովքեր կուղեկցեն մեզ դեպի նոր նպատակներ: Եվ այդ ամենը պետք է կատարվի շատ օբյեկտիվ և բանական միջավայրում: Կարծում եմ, որ այդ ելակետին դեռ չենք հասել»,-«Առաջին Լրատվական»-ի հետ զրույցում ասաց արաբագետ Արմեն Պետրոսյանը:

Նրա խոսքով՝ այսօր բոլորս ենք ծանր հոգեվիճակում, բայց պետք է առերեսվել իրականությանը և նայել առաջ: «Վերջին երկու հարյուր տարվա համատեքստում այս տարածաշրջանում Հայաստանին կամ այլ երկրներին առնչվող խաղաղ ժամանակահատվածը երևի թե չորս տասնամյակից չի անցել: Այսինքն, մենք մշտապես եղել ենք տարաբնույթ դերակատարների մասնակցությամբ պատերազմների մեջ: Եվ այս պատերազմն էլ հաստատ վերջինը չէ: Հաջորդ պատերազմը շատ ավելի մոտ է լինելու, դրա մասին են վկայում ներկա աշխարհաքաղաքական իրավիճակը, տարածաշրջանային զարգացումները: Մի կարևոր շեշտադրում եմ ցանկանում կատարել. չպետք է պատրաստվենք խաղաղության, եթե այս մեկնակետից մեզ տրամադրում ենք խաղաղության, իմ համոզմամբ՝ դա սխալ շեշտադրում է: Միևնույն ժամանակ չպետք է մեզ պատրաստենք պատերազմի, պետք է պատրաստենք հաղթանակի, սա է ամենակարևորը: Իսկ թե այդ հաղթանակն ինչպես կտրվի, յուրաքանչյուրիս անելիքն է… Հաղթանակները միայն ռազմի դաշտում չեն տրվում»,-ասաց Պետրոսյանը՝ հավելելով, որ ներկայում հասել ենք այս իրավիճակին, քանի որ մյուս բոլոր ուղղություններում տանուլ ենք տվել:

  • Դիտումներ՝ *