Պատերազմը սկսվել էր Հայաստանի պետականությունը վերացնելու նպատակով, դա ավելին է, քան ցեղասպանությունը: Այս մասին «Առաջին լրատվական»-ի հետ զրույցում ասաց քաղաքագետ Լևոն Շիրինյանը: «Ինձ մոտ պատկերացումները չեն փոխվել մեր զինվորների ու սպաների մասին, մանավանդ 18-20 տարեկանների առումով: Իրականում մեր պետականությունն ամուր ձեռքերում է, իսկ խառնաշփոթը, հրամկազմում զանազան խոսակցություններն ինձ համար անակնկալ էին. այդ ամենը գողապետության զարգացման արդյունք է»,- նշեց քաղաքագետը:
Անդրադառնալով դիտարկմանը, որ փոխադարձ մեղադրանքներ են հնչում, օրինակ՝ այսօր Մովսես Հակոբյանը վարչապետին մեղադրել է ԶՈՒ լրահամալրումը կանգնեցնելու մեջ, Շիրինյանը նշեց, որ նրա ասածների մի մասը գուցե կեղծ է, գուցե մի մասը՝ ճիշտ, բայց դա ռազմական գաղտնիք է և գեներալը իրավունք չուներ բարձրաձայնելու և հասարակությանը բարոյալքելու, դրա ժամանակը մենք չունենք: «Այդ գեներալներին առաջին հերթին պետք է հարցնել՝ որտեղի՞ց քեզ դղյակ, և ամեն ինչ պարզ կլինի»:
Քաղաքագետի խոսքով՝ ժամանակին եթե ռեֆորմներ լինեին, յուրաքանչյուրն իր տեղում կլիներ: «Զինվորականները պետք է զուսպ լինեն, շատ խոսելու իրավունք չունեն: Խնդիրները կարելի է ներկայացնել զեկույցներով, վերլուծություններով, քննարկել հանդիպումներում, Գլխավոր շտաբում, հրամկազմում: Եթե այդպիսի վիճակ է եղել, ինչո՞ւ ինքը ժամանակին չի զեկուցել, իր պատասխանատվությունը ո՞րն է եղել»,- ասաց Շիրինյանը:
Նա նաև ընդգծեց, որ մեր հասարակությունն այսուհետ պետք է կարգախոս ունենա՝ մահ թավիշին՝ առաջին հերթին բանակում, ուժային կառույցներում.«Մեզ նոր գեներալիտետ է պետք: Մյուս հարցերը կկարգավորվեն: Այսօրվա խոսակցությունն ուղղված է միայն իշխանություն փոխելուն»:
Քաղաքագետի դիտարկմամբ՝ անթույլատրելի է այդպիսի խոսակցություններով ասուլիս անելն ու հրապարակելը: «Այսօր մենք Զինված ուժերի մարտունակությունը պահելու, շատ արագ վերակազմակերպվելու խնդիր ունենք: Մենք ունենք փխրուն զինադադար: Ցանկաած պահի այն կարող է խախտվել, չպահպանվել: Ռազմական գործողությունները ցանկացած պահի կարող են վերսկսվել»,- իր մտահոգությունն արտահայտեց քաղաքագետը:
Մանրամասները՝ տեսանյութում:
