Ֆուտբոլի Հայաստանի ազգային հավաքականը վաղը Նիկոսիայում կանցկացնի այս տարվա վերջին հանդիպումը։ Ազգերի լիգայի խաղարկության խմբային փուլի վերջին տուրում մերոնք կհյուրընկալեն Հյուսիսային Մակեդոնիային։ Հիշեցնենք, որ այս հանդիպումը պետք է կայանար Երևանում, սակայն հիմք ընդունելով պատերազմական իրավիճակը ՈւԵՖԱ-ն որոշում էր կայացրել մրցավեճը չեզոք դաշտում անցկացնելու վերաբերյալ։
5-րդ տուրից հետո Հայաստանի հավաքականն ունի 8 միավոր և միայն մեկ միավոր է զիջում առաջատար Հյուսիսային Մակեդոնիային: Երրորդ տեղում Վրաստանն է 6 միավորով, իսկ Էստոնիան ունի միայն 2 միավոր:Հաղթանակի դեպքում մեր հավաքականը հաղթող կճանաչվի ենթախմբում։ Երկու օր առաջ Թբիլիսիում Վրաստանի դեմ հանդիպումը ցույց տվեց, որ Հայաստանը կարող է հաղթել և պատրաստ է պայքարել խմբում առաջին հորիզոնականի համար։ Մերոնք ցույց տվեցին, կազմակերպված, բալանսավորված և դինամիկ ֆուտբոլ։ Ինչ խոսք եղան նաև սխալներ և բացթողումներ, բայց ընդհանուր առմամբ թիմային ֆուտբոլն իր բարձրության վրա էր։ Հայաստանի հավաքականի միակ թույլ օղակը թերևս պաշտպանության ձախ եզրն էր, որտեղ հանդիպման մեկնարկից խաղում էր Արման Հովհաննիսյանը։ Վերջինիս սխալի հետևանքով վրացիները ստացան 11 մետրանոց հարվածի իրավունք և հավասարեցրին հաշիվը։ Թե ինչու է մեր հավաքականի գլխավոր մարզիչ Խոակին Կապառոսը շարուակում վստահել այս ֆուտբոլիստին՝ դժվար է ասել։ Վրաստանի դեմ խաղում Հովհաննիսյանի փոխարինած Սերոբ Գրիգորյանը շատ ավելի լավ տպավորություն թողեց և տրամաբանական կլինի, որ հենց այս ֆուտբոլիստը Հյուսիսային Մակեդոնիայի դեմ խաղում լինի մեկնարկային կազմում։
Միևնույն ժամանակ հարկ ենք համարում նշել նաև, որ միանգամայն տրամաբանական կլինի նաև Հայաստանի հավաքականի մեկնարկային կազմը չփոփոխելը։ Ֆուտբոլում չգրված օրենքի համաձայն հաղթող կազմը չեն փոխում։ Ինչևէ, Փորձելով գնահատել մեր հավաքականի հաղթելու հնարավորությունները հարկ ենք համարում ուշադրություն դարձնել մի քանի հանգամանքներին։ Ազգերի լիգայի նախորդ խաղարկության D դիվիզիոնի եզրափակչում նոյեմբերի 12-ին մակեդոնացիները 1։0 հաշվով հաղթել էին Վրաստանին։ Հյուսիսային Մակեդոնիան պատմության մեջ առաջին անգամ կխաղա Եվրոպայի առաջնության եզրափակիչ փուլում։ Սա բացառիկ արդյունք է։ Հյուսիսային Մակեդոնիան գրանցելով պատմական հաջողություն, նույն մոտիվացիայով դժվար թե ներկայանա առաջիկա հանդիպմանը։ Նշենք, որ Ազգերի լիգայի ընթացիկ խաղարկությունն ըստ էության հնարավորություն չի տալիս ձեռք բերելու 2022 թվականի աշխարհի առաջնության եզրափակիչ փուլի ուղեգիր։ Ուստի մրցաշարային առումով Հայաստանի հավաքականի հետ հանդիպումը Հյուսիսային Մակեդոնիայի համար այնքան էլ կարևոր չէ։ Ինչպես հայտնում է Macedonian Football-ը Հայաստանի հավաքականի հետ հանդիպմանը տարբեր պատճառներով չեն մասնակցի առաջատարներ Գորան Պանդևը, Էնիս Բարդին, Արիան Ադեմին, Էզջան Ալիոսկին, դարպասապահ Ստոլե Դիմիտրևսկին, Բոբան Նիկոլովը, Ստեֆան Սպիրովսկին ու «Նապոլիի» կիսապաշտպան Էլիֆ Էլմաս: Թերևս հայտնի է, որ Էլմասը մկանային վնասվածք ունի, իսկ Պանդևը հրաժարվել է մասնակցել խաղին: Նշենք, որ հենց մակեդոնական ֆուտբոլի լեգենդ Պանդևի խփած գոլի շնորհիվ էր մեր առաջիկա մրցակիցը հաղթել էր Վրաստանին։ Պանդևն և մյուս առաջատար ֆուտբոլիստները հավանաբար նախընտրել են հանգստանալ և ռիսկի չդիմել։ Հիշեցնենք, որ երկու օր առաջ Հյուսիսային Մակեդոնիան Ազգերի լիգայի 5-րդ տուրում սեփական հարկի տակ 2։1 հաշվով առավելության էր հասել Էստոնիայի նկատմամբ։ Փաստորեն, վաղը Հյուսիսային Մակեդոնիան 6 օրվա ընթացքում կանցկացնի 3-րդ պաշտոնական հանդիպումը։
Կարծում ենք ակնհայտ է, որ նման գրաֆիկով և ծանրաբեռնվածությամբ բավական դժվար է խաղալ բարձրորակ ֆուտբոլ։ Ուստի հավանականությունը մեծ է, որ վաղը ոչ հիմնական կազմով խաղալուց զատ Հյուսիսային Մակեդոնիան կունենա նաև այլ խնդիրներ։ Ամեն դեպքում սա չի նշանակում, որ Հայաստանի հավաքականի հաղթանակը երաշխավորված է և որ Նիկոսիայում մերոնց հեշտ հանդիպում է սպասվում։ Վաղվա հանդիպումը պատմական նշանակություն ունի մեզ համար։ Առաջին անգամ հնարավորություն ունենք ընտրական մրցաշարի հաղթողը դառնալու և պարտավոր ենք օգտագործել այդ հնարավորությունը։ Բուքմեյքերներն այս մրցավեճում մի փոքր ավելի հավանական են համարում Հայաստանի հավաքականի հաղթանակը։
Մասնավորապես, մերոնց հաղթանակի համար սահմանված է 2․45 գործակից։ Ոչ-ոքին գնահատված է 3․53, իսկ Հյուսիսային Մակեդոնիայի հաղթանակը՝ 3․06 գործակցով։