«Հայաստանում արմատական փոփոխություններ են պետք։ Ոչ միայն պաշտոնյաների, այլ նաև ստրատեգիայի փոփոխություն»,- «Առաջին լրատվական»-ի հետ զրույցում նման տեսակետ հայտնեց ԳԽ պատգամավոր Ազատ Արշակյանը։
Նրա խոսքով՝ այն ճանապարհը, որով մենք գնում էինք, մեզ տարել է ռազմական պարտության, Շուշիի կորստի, տնտեսական ճգնաժամի. «Այդ ճանապարհը մեզ համար կործանարար է։ Հիմա շատ բան պետք է վերանայվի, փոխվի, ու այդ փոփոխությանը համապատասխան պետք է լինեն կադրային փոփոխություններ՝ անշուշտ, առանցքային պաշտոններում, սկսած Ազգային ժողովից»։
Արշակյանն ընդգծեց՝ այսօր Հայաստանը զարգացման ծրագիր չունի. «Չի կարող Հայաստանը առանձին վերցրած զարգանալ, առաջ գնալ, երբ իր տնտեսական, քաղաքական ու ռազմական գործընկերները հետ են գնում, ենթարկվում են տարբեր պետությունների կողմից տնտեսական ու քաղաքական սանկցիաների։ Բռնապետությունների ակումբում ժողովրդավարական Հայաստանը ինչպե՞ս կարող է առաջընթաց ապրել։ Հայաստանն այդ միությունում խորթ է։ Եվրասիական միությունը, ԱՊՀ-ն, Մաքսային միությունը, ՀԱՊԿ-ը հետադիմություն ապահովող կազմակերպություններ են։ Հայաստանն այնտեղ չի կարող առանձին վերցրած առաջընթաց ապրել։ Հարցը հարկավոր է այդպես դնել։ Առաջընթաց՝ նշանակում է լինել առաջ գնացող պետությունների հետ առաջընթաց ապահովող ծրագրեր ունենալ։ Անվտանգություն՝ նշանակում է անվտանգային համակարգ, ոչ թե վտանգավորության համակարգ։ Այդ երկրները բոլորը գտնվում են հատուկ վտանգավոր վիճակում։ Այդ տարածքներում պատերազմներ, հեղաշրջումներ են, արյունահեղություն, ճգնաժամ ու բռնապետություն։ Մենք պետք է ազգովի որոշում կայացնենք»,- եզրափակեց մեր զրուցակիցը։