Վրաստանում ընդդիմադիր կուսակցությունների ներկայացուցիչներն ու նրանց կողմնակիցները հերթական բողոքի ցույցն են անցկացնում Թբիլիսիի խորհրդարանի շենքի դիմաց՝ պահանջելով նոր խորհրդարանական ընտրություններ, հաղորդում է «ՌԻԱ Նովոստին»:
«Պահանջները մնում են նույնը և ուժի մեջ են այնքան ժամանկ, քանի դեռ մենք չենք հասել արդյունքի: Մենք պահանջում ենք նշանակել նոր խորհրդարանական ընտրություններ, փոխել կենտրոնական ընտրական հանձնաժողովի ղեկավար կազմը և ազատել քաղբանտարկյալներին:
Այն փաստը, որ կողմերի միջև երկխոսություն է սկսվել, չի նշանակում, որ փողոցային բողոքները կդադարեն», – հայտարարել է «Միացյալ ազգային շարժում» կուսակցության անդամ Զաալ Ուդումաշվիլին:
Վրաստանում խորհրդարանական ընտրությունները տեղի ունեցան հոկտեմբերի 31-ին: Ըստ ԿԸՀ-ի՝ ձայների 100% -ը հաշվելուց հետո իշխող «Վրացական երազանք» կուսակցությունը հավաքել է ձայների 48,22% -ը: Ընդհանուր առմամբ, խորհրդարան է մտնում յոթ քաղաքական կուսակցություն և երկու դաշինք, մինչդեռ ընդդիմադիր ուժերը չեն ճանաչում ընտրությունների արդյունքների օրինականությունը և հրաժարվում են պատգամավորական մանդատներից: Նրանք պահանջում են նոր խորհրդարանական ընտրություններ և կենտրոնական ընտրական հանձնաժողովի ղեկավարի հրաժարականը:
