Ժամեր անց Թբիլիսիի «Դինամո» մարզադաշտում տեղի կունենա Ազգերի լիգայի խաղարկության խմբային փուլի 5-րդ տուրի Վրաստան-Հայաստան մրցավեճը: Հիշեցնենք, որ մեկ ամիս առաջ մեր հավաքականը Լեհաստանի Տիխի քաղաքում ոչ-ոքի 2։2 էր խաղացել վրացիների հետ։ Մերոնց միայն հանդիպման վերջին րոպեին էր հաջողվել խուսափել պարտությունից։ Եկել է հաղթելու ժամանակը։ Շատերն այսօր էլ այն կարծիքին են, որ Հայաստանի ազգային հավաքականը վերածվել է ֆուտբոլիստների մի խմբի, որոնք խաղում են մեր երկրի արժանապատվության հետ: «Մենք ձեր աջակցության կարիքը շատ ունենք»,- վերջին շրջանում շարունակ ասում են մեր ֆուտբոլիստները։ Ֆուտբոլիստն իսկապես ունի երկրպագուի աջակցության կարիքը:
Այսօր խաղադաշտ դուրս եկած յուրաքանչյուր ֆուտբոլիստ պարտավոր է անել անհնարինը, պայքարել մինչև վերջ: Ազգային հավաքականի մարզաշապիկը կրող ֆուտբոլիստը պետք է գիտակցի, որ խաղից հետո հաշվետու է երկրպագուին, պետությանը: Սա ամենևին չի նշանակում, որ յուրաքանչյուր խաղում մեր հավաքականը պարտավոր է հաղթել: Պարզապես պետք է խաղալ այնպես, որ սեփական խղճի առաջ մաքուր լինելով, պարզ ճակատով կարողանաս շնորհակալություն հայտնել աջակցության համար: Ցավոք, եղել են նախադեպեր, երբ մեր ֆուտբոլիստները հեռացել են դաշտից: Եղածը եղած է, և հիմա ժամանակը չէ խոսելու նեգատիվ երևույթների մասին, որոնք անցյալում են: Մենք կարող ենք համախմբվել, ցույց տալ որ կարող ենք։ 2007 թվականին Հայաստանի հավաքականը ֆանտաստիկ հանդիպումներ անցկացրեց Լեհաստանի և Պորտուգալիայի հավաքականների հետ:
Մեր ֆուտբոլիստները խաղադաշտում ներդրեցին ողջ ներուժը և, կարելի է ասել, գլխից վեր ցատկեցին: Այդ հանդիպումներում խաղադաշտ դուրս եկած ֆուտբոլիստների ենթագիտակցության մեջ լուսահոգի մարզիչ Յան Պորտերֆիլդն էր, որը տառապում էր քաղցկեղով, սակայն ծանր վիճակում, մահվան շեմին կանգնած էր Հայաստանի հավաքականի կողքին: Այսօր այն բացառիկ դեպքերից է, երբ անցյալում տեղի ունեցածի վրա աչք փակելով՝ հասարակությունը կանգնած է ազգային հավաքականի կողքին: Այսօր մեր ֆուտբոլիստներն ունեն հնարավորություն՝ ապացուցելու, որ հասարակության մի մասնիկն են: Քննությունը պատշաճ կերպով հանձնելու համար կան նախադրյալներ: Քննություն, որը ձախողելը չի ընկալվի և ընդունվի: Այո, կան խնդիրներ, որոնք հիմնականում կադրային են:
Հավաքականում չէ թիմի ավագ Հենրիխ Մխիթարյանը: Կան կադրային այլ խնդիրներ։ Նման խնդիրներ լինելու են միշտ: Այսօր մեր խնդիրն է ոչ թե խնդիրների մասին հիշատակելը, այլ խնդիրները հաղթահարելով արդյունքի հասնելը:
