Իրականում ի՞նչ է տեղի ունեցել․ Ադրբեջանը հաղթե՞լ է, թե՞ հայկական կողմն է պարտվել, թե՞ ռուսական կողմն է հաղթել, թե՞ իրականում ոչ ոք էլ չի հաղթել, այլ պարզապես Ռուսաստանն ու Թուրքիան միասին համաձայնության են եկել․ «Առաջին լրատվական»-ի հարցին «Ժողովրդավարական համախմբում» նախաձեռնության համահիմնադիր Սուրեն Պետրոսյանը պատասխանեց․ «Պարզ է մի բան, որ կատարվել է պետական հանցագործություն, որն իր նախադեպը չի ունեցել վերջին 100 տարվա ընթացքում։ Դա հստակ է, և պետք է ֆիքսենք։ Ինչ վերաբերում է հաղթող կամ պարտվող կողմին, ապա պետք է ֆիքսենք, որ Հայաստանի Հանրապետությունը պարտվել է՝ փաստացիորեն կապիտուլացվել է։ Դրանից հետո նոր արդեն երկրորդ հարցն է․ բոլոր գերակա դերակատարները՝ Թուրքիա, Ռուսաստան, Ադրբեջան, Իսրայել և այլն, հաղթել են, բացի Հայաստանի Հանրապետությունից։ Առաջին խնդիրը, որ մեզ պետք է հետաքրքրի՝ հենց դա է։
Ո՞վ պարտվեց։ Պարտվեցինք միմիայն մենք։ Ոչ թե գնացինք փոխզիջման, կամ որոշակի զիջումների, որը թույլ կտար, որ մենք հետագայում հզորանանք ու վերադառնանք, այլ իրականում մենք փաստացիորեն հանձնեցինք ամբողջ Արցախը։ Իշխող կուսակցությունն ասում է՝ Արցախը կանգուն է, և մենք կհզորանանք։ Սա մեծագույն և լրջագույն միֆ է։ Չկա նման հասկացողություն։ Այս պահի դրությամբ Արցախն ամբողջությամբ հանձնված է, որը պետական մեծագույն հանցագործություն է։ Հետագայում ի՞նչ ռազմական գործողությունների մասին կարող է խոսք գնալ, եթե չունենք Վարդենիսի ճանապարհ, Շուշիի ճանապարհը վերահսկվում է Ադրբեջանի կողմից։ Եվ էսպիսի բավականին շատ խնդիրներ կարող եմ թվարկել, որ մենք փաստացիորեն կորցրել ենք Արցախը։ Ես հասկանում եմ, որ դա շատ ցավոտ իրականություն է, բայց ինչքան հնարավոր է՝ մենք պետք է շուտ ընդունենք այդ իրականությունը, որպեսզի հասկանանք, թե հաջորդ քայլը որը պետք է լինի, ինչ խնդրի պետք է ուղղված լինի մեր ամբողջ ջանքերը»։
Մանրամասները՝ տեսանյութում։
