ԱԺ «Իմ քայլը» խմբակցությունը հայտարարություն է տարածել այն բանից հետո, երբ տեղի են ունեցել վարչապետի ու կառավարության հրաժարականի կոչերով հանրահավաք և երթ, ինչպես նաև այդ հարցով ԱԺ արտահերթ նիստ անցկացնելու պահանջ: Հայտարարությունը կրկնում է այս օրերին իշխանությունների թեզերը, իսկ վերջում ընդդիմության պահանջներին ի պատասխան առաջարկվում է պատասխանել 3 հարցի՝ 1. Կողմնակի՞ց են ռուսական միջնորդության չեղարկմանը, 2. Կողմնակի՞ց են ռուսական խաղաղապահների դուրսբերմանը շփման գծից, 3. Կողմնակի՞ց են պատերազմի շարունակմանը, և «ներկայացնել առաջարկվող վերսկսվելիք պատերազմում հաղթանակի հասնելու ճանապարհային քարտեզը»:
Խմբակցության պատգամավորներից մեկն արդեն իսկ հայտարարել է խմբակցությունից դուրս գալու և որպես անկախ պատգամավոր գործելու իր որոշման մասին։
Քաղտեխնոլոգ Վիգեն Հակոբյանի կարծիքով՝ «Իմ քայլի» կողմից տարածված հայտարարությունը ոչ թե քաղաքական էր, այլ մանիպուլյատիվ: «Այսինքն՝ թեմայից շեղելու խնդիր է դրված՝ իբր ռուսներին հաճոյանալու, ցույց տալու, թե Նիկոլ Փաշինյանի հրաժարականը պահանջողները հակառուսական դաշտից են։ Դա տարրական մանիպուլյացիա էր, որը բավականին պրիմիտիվ էր, ուստի դրան առանձնապես լուրջ ուշադրություն չդարձրեց քաղաքական դաշտի հակառակորդ կողմը»,- «Առաջին լրատվական»-ի հետ զրույցում ասաց նա։
Ըստ Հակոբյանի՝ այն, ինչ այսօր տեղի է ունենում իշխող խմբակցությունում, բնական պրոցես է. «Հնարավոր չէ, որ 88 մարդ, որոնք առավել ևս տարբեր կյանքի ճանապարհ են անցել, տարբեր արժեհամակարգեր ունեն՝ լիբերալ, ազգայնական, պարզ է, որ նրանց տեսակետները հող հանձնելու նկատմամբ տարբեր պետք է լինեին։ Ես զարմանում եմ նույնիսկ, որ առայժմ մեկ հոգու մասին է խոսքը, թեպետ կան որոշակի տարաձայնություններ նաև այլ անդամների մեջ։ Սոֆյա Հովսեփյանը հայտարարեց, որ ևս մի քանի պատգամավորներ տեղյակ չեն եղել այդ տեքստին։ Այս ամենը ավելի է խորանալու՝ ոչ միայն քաղաքական դաշտում, այլև պետական ապարատում։ Մենք հիմա տեսնում ենք, որ կան այդպիսի նշաններ։ Ուժային կառույցներում, օրինակ, այդպիսի իրավիճակ կա։ ԱԱԾ ղեկավարի ժամանակավոր նախկին պաշտոնակատարի հայտարարությունը միայն իր կարծիքը չէ, դա որոշակի շրջանակների կարծիքն է։ Դատական համակարգը, որը հրաժարվում է կալանավորել Նիկոլ Փաշինյանին դավաճան համարող, նրա հրաժարականը պահանջող ուժերին, նույնպես ցույց է տալիս, որ կա անհամաձայնություն։ Նույնիսկ այն, որ երեկվա հանրահավաքին եկել էր Վալերի Օսիպյանը, նույնպես մեսիջ է, որ ուժային կառույցներում հիացած չեն այն իրադարձություններով, այն ստորագրած կապիտուլյացիայով, որը բոլորիս անակնկալի բերեց»։
Մեր զրուցակիցն ընդգծեց՝ սա զանգ է, որ հնչում է Նիկոլ Փաշինյանի ու իշխանության համար. «Ես բազմիցս ասել եմ՝ բարդ է պատկերացնել, որ երկիրը կարող է ղեկավարել մի մարդ, որը երկիրը պարտության է բերել, ստորագրել կապիտուլյացիա ու անհասկանալի պայմաններով տարածքներ է հանձնում։ Չի կարող պատահել, որ իշխանական համակարգում՝ սկսած իր քաղաքական հենարանից, վերջացրած պետական ապարատով, բոլորը ուզենան կիսել այդ խայտառակ կապիտուլյացիան։ Առավել ևս, որ գերակշիռ մասը որևէ բանի հետ առնչություն չի ունեցել, ու իրենց գործառույթները փորձել են կատարել առավելագույնս բարեխիղճ։ Շատերը նույնիսկ ունեցել են հարազատ զոհեր, ու հիմա ոչ ոք չի ցանկանա ուրիշի գործարքների համար պատասխանատվություն վերցնել»։
