2021 թվականին Հայկական ատոմակայանը մոտ 140 օրով կանգնելու է՝ սովորաբար նախատեսված 45 օրվա փոխարեն և այդ ընթացքում չարտադրված էլեկտրաէներգիան փոխարինվելու է ՋԷԿ-երում արտադրված էլեկտրաէներգիայով:
Էլեկտրաէներգիայի արտադրության ոլորտում հնարավոր լարվածության թեմայի շուրջ «Առաջին լրատվական»-ը զրուցել է Փոքր ՀԷԿ-երի միության նախագահ Նաիրա Նահապետյանի հետ, ով նշեց, որ այս պահին գլխավոր խնդիրը Հայաստանի տարածքում գտնվող բոլոր հէկ-երը աշխատացնելն է:
Դիտարկմանը, որ հնարավոր է էլեկտրաէներգիայի դեֆիցիտ լինել նաև Արցախում վնասված հէկ-երի պատճառով, ն րձագանքեց. «Ընդհանուր ծավալների մեջ, իհարկե, կունենանք Արցախի հէկ-երի հետ կապված պրոբլեմ: Այս պահին ամբողջական տվյալները չունենք, թե Արցախում քանի հէկ է կանգնած, ինչ վիճակ է, մոտակա 10 օրվա ընթացքում նոր պարզ կլինի, թե ինչ թվերի մասին է խոսքը:
Թե ընդհանուր սպառման հետ կապված ոնց կկարողանանք կարգավորել խնդիրը, դեռ ոչ մի կոնկրետ ցուցումներ չունենք, որովհետև հիմա նոր-նոր սկսվում են մյուս փուլի, այսինքն ազատ հոսքերի հէկ-երի աշխատանքները: Կարծես թե եթե լուրջ վթարներ չլինեն, կկարողանանք ապահովել անհրաժեշտ ծավալները»:
Դիտարկմանը, թե հնարավո՞ր է, էլեկտրաէներգիայի սակագնի բարձրացում, Նաիրա Նահապետյանն արձագանքեց. «Ոչ, ընդհանրապես դա չի քննարկվել այդ հարցը: Անգամ եթե սակագինը բարձրանա, դրանից ծավալների աճ չի կարող լինել: Այսինքն սակագինը ծավալների հետ ընդհանրապես կապ չունի: Հիմա ամենաառաջնահերթությունն այն է, որ կարողանանք ամբողջ սպառման ծավալներով կարողանանք աշխատել:
Այս պահին մեր հիմնական խնդիրն այն է, որ կարողանանք Հայաստանի տարածքում գտնվող բոլոր հէկ-եր աշխատացնել: Այսինքն այն հէկ-երը, որոնք վերանորոգման կամ այլ խնդիրներ ունեն, կարողանանք արագ վերականգնել և ցանցում ներառել»:
Նշենք, որ նախօրեին Հանրային ծառայությունները կարգավորող հանձնաժողովի նախագահ Գարեգին Բաղրամյանը հայտնել էր, որ աննախադեպ երկար՝ 140 օրով կանգնելու է Հայաստանի ատոմակայանի աշխատանքը. «2021 թվականին նախատեսվում են ատոմակայանի կյանքի երկարաձգման ամենամեծ աշխատանքները։ Եվ աննախադեպ երկար կանգնելու է ատոմակայանը՝ մոտ 140 օր՝ սովորաբար նախատեսված 45 օրվա փոխարեն։ Եվ իր կանգառի ժամանակ չարտադրված էլեկտրաէներգիան փոխարինվելու է ՋԷԿ-երում արտադրված էլեկտրաէներգիայով»,- նշել էր Բաղրամյանը։