Մարտական գործողությունները շարունակվում են սահմանի ամբողջ երկայնքով․ թշնամին անցել է օջախային կռիվների։ «Առաջին լրատվական»-ի հետ զրույցում այս մասին ասաց պաշտպանության նախարարության ներկայացուցիչ Արծրուն Հովհաննիսյանը։
«Երեկ Մարտունիի ուղղությամբ թշնամուն հաջողվել է երկու դիրք վերցնել․ այդ հատվածում թեժ մարտեր են ընթացել՝ օգտագործվելով տարբեր միջոցներ՝ օդուժ, զրահատանկային միավորներ, հրետանի, հետևակ։ Բայց ընդհանուր ռազմաճակատի ամբողջ երկայնքը վերցրած, ընդգրկվածությունը և թեժությունը նման չէ առաջին 15 օրվա մարտերին, առանձին գրոհող և դիվերսիոն խմբեր են գործում, փորձում են առանձին լոգիստիկ ցանցային կապուղիների, բնակավայրերի կապուղիների հաջողություններ զարգացնել։
Հովհաննիսյանի խոսքով՝ Ադրբեջանը թքած ունի իր դիակների վրա , իսկ ահաբեկիչներին օգտագործում է որպես թնդանոթի միս։
«Պատերազմի 20-25-րդ օրը, սպառելով ցամաքային հարվածային բռունցքի ներուժի անցել են ավելի օջախային կռիվների, որպեսզի կարողանան թուլացնել մեր պաշտպանությունը և այնպիսի բնագծեր, որոնք թեկուզ փիարի առումով շատ կարևոր են և ոգևորիչ կլինեին։ Դրանք հիմնականում անտառային հատվածների բնակավայրեր են։ Բայց տեղանքը լավ չգիտեն և այս ուղղությամբ ավելի քիչ հաջողություններ ունեցան։
Չեմ ուզում անհարկի էյֆորիկ ոգևորություն տիրի, քանի որ մարտերը շարունակվում են, բայց փաստն այն է, որ Հադրութից հյուսիս, Մարտունիից հարավ միջանցիկ հատվածը, Կարմիր Շուկա-Շուշիի մայրուղու հարակից մի քանի գյուղերում հաջողություններ ունենալով՝ կանգ առան և չկարողացան հաջողություններ զարգացնել և շատ լուրջ կորուստեն են կրել»,- ասաց ՊՆ ներկայացուցիչը։
«Ադրբեջանական բանակի և հարակից տեռորիստական խմբավորումների հարձակողական մեծ թափը կոտրված է․․․ Ունենք դիրքային բարելավումներ. կասեցնում ենք Բերձորին սպառնացող վտանգը»։
Մանրամասն՝ տեսանյութում։