ՀԱԿ-ը, ըստ էության, նոր ձևաչափ էր ընդդիմադիր դաշտում։ Այն նպատակները, որոնք ՀԱԿ-ի ստեղծման հիմքում էին դրված, հենց այն նպատակներն էին, որոնք ընդդիմադիր զանգվածը մինչ Համաժովրդական շարժման ստեղծումը չէր կարողանում հստակ ձևակերպել։ «Առաջին լրատվական»-ի հետ զրույցում անդրադառնալով ՀԱԿ-ի եռամյա գործունեությանը՝ ասաց Ռազմավարական և ազգային հետազոտությունների հայկական կենտրոնի (ՌԱՀՀԿ) փորձագետ Էդգար Վարդանյանը։
«Թեև ՀԱԿ-ը 3 տարեկան է, սակայն պետք է ասել, որ նրա հիմքը դրվեց 2007 թ. սեպտեմբերից 21-ին, երբ Լևոն Տեր-Պետրոսյանը «Մարիոթ» հյուրանոցում բացահայտեց, նկարագրեց նոր ձևավորվող շարժման հիմքը»,- նշեց Է.Վարդանյանը՝ հավելելով, որ այդտեղ մեծ դեր է խաղացել ռեժիմին ադեկվատ գնահատական տալու հանգամանքը և դրանից բխող տրամաբանական նպատակը՝ հասնել ռեժիմի փոփոխության, սահմանադրական կարգի հաստատման։
Գնահատելով Հայ ազգային կոնգրեսի անցած ուղին՝ փորձագետը կարևորեց այն փաստը, որ ՀԱԿ-ը հաջողեց այս տարիներին դիմակայել և մնալ հիմնական ամենախոշոր ընդդիմադիր քաղաքական ուժը, կարողացավ հասնել նրան, որ իշխանությունները հաշվի նստեցին կազմակերպված ընդդիմության գործոնի հետ։
«Սակայն, իշխանությունները փորձեցին օգտագործել և հիմա էլ փորձում են օգտագործել ՀԱԿ-ին իրենց «ռեֆորմիստական ծրագրերը» կյանքի կոչելու հարցում»,- նկատեց փորձագետը՝ ավելացնելով, թե այսօր ՀԱԿ-ն ընկալվում է որպես նեղ քաղաքական, քան քաղաքացիական ուժ, թեև սկզբնապես «ավելի շատ միտում ուներ դառնալ քաղաքացիական շարժում»։
Ըստ նրա՝ ՀԱԿ-ը, որպես իրական համազգային, համաժողովրդական միավոր, այսօր արդեն չի ընկալվում շատերի կողմից: Ընդդիմադիր հայացքներ ունեցող մարդկանց մի մասը ներկայումս հիասթափված է ՀԱԿ-ից և այլ ձևաչափեր է փնտրում։
