«Առաջին լրատվական»-ի հարցերին պատասխանել է գործարար Սիլվա Համբարձումյանը:
– Տիկին Համբարձումյան, տեսակետ կա, որ այս պատերազմի ընթացքում օլիգարխները, որոնք ապօրինի ճանապարհով հարստացել են Հայաստանում, պետք է պետությանը վերադարձնեն իրենց թալանած փողերը, և դրանով համերաշխություն կհաստատվի: Դուք որքանո՞վ եք կիսում նման մոտեցումը:
– Ես կարծում եմ, որ Նիկոլ Փաշինյանը դա ուշացրել է, վաղուց պետք է աներ, և այդ գումարներով մենք մեր բանակը կհզորացնեինք զենքերով և ավելի արագ կհաղթեինք: Էլի կհաղթենք, բայց օլիգարխները պետք է ժողովրդից գողացած գումարները վերադարձնեն: Պետք չի, որ իրենք նստեն, եթե այդ փողերը վերադարձնեն, իրենց նստելու կարիքը չկա, թող ապրեն իրենց կյանքով:
– Ամեն դեպքում սա համերաշխության հասնելու տարբերակ համարո՞ւմ եք:
– Այո, թող ժողովրդից գողացած բոլոր գումարները փոխանցեն բյուջե, և թող լինի համերաշխություն: Թող պատժվեն միայն դավաճանները:
– Եթե բանակաշինության համար այդ գումարները ներգրավվեն, հասարակությունը որոշակի առումով ավելի ներողամի՞տ կլինի նրանց նկատմամբ:
– Ես կարծում եմ՝ այո: Լավ կլինի, որ այդ գումարները այնքան լինեն, որ և բանակը հզորացնենք ու հաղթենք, իսկ հաղթանակից հետո նաև փորձենք զոհվածների ու վիրավորների ընտանիքներին օգնել:
– Վարչապետը հայտարարեց, որ այս ընթացքում հարկ վճարողներն ավելի պարտաճանաչ են դարձել: Կարո՞ղ ենք ասել, որ այս պատերազմական իրավիճակը սթափեցրել է գործարարներին:
– Ես կարծում եմ, որ անպարտաճանաչ հարկատուներն այս պայմաններում մտածել են, որ իրոք պետք է հարկերը վճարեն, որպեսզի բանակը հզորանա: Ինչքան մեր բանակը հզոր լինի, այնքան մենք կապրենք խաղաղ ու կայուն երկրում, և մեր բիզնեսն էլ կծաղկի:
– Իսկ պատերազմական այս իրավիճակը որքանո՞վ է բացասական անդրադարձ ունենում տնտեսության վրա, ներդրումների վրա:
– Ես կարծում եմ, որ Հայաստանն ու Սփյուռքը մեր թասիբի համար Արցախը ավելի արագ կկառուցեն, քան նախկինում տարիներ շարունակ: Ես կարծում եմ, որ բոլորս Արցախին թև ու թիկունք կլինենք, և 2-3 տարում Արցախը ավելի լավը, ավելի հզոր ու ավելի գեղեցիկ կլինի, քան նախքան պատերազմը:
– Այս ընթացքում Գագիկ Խաչատրյանը, Գագիկ Ծառուկյանն ազատ արձակվեցին, Ռոբերտ Քոչարյանի անձնագիրը հետ տվեցին: Այս հանգամանքը ինչպե՞ս եք գնահատում:
– Ես համամիտ եմ, որ նույն Գագիկ Խաչատրյանը չնստի, բայց բյուջեին փոխանցի միլիոններ: Նույնը վերաբերում է Գագիկ Ծառուկյանին: Եթե դա կանեն, ուրեմն համերաշխություն կլինի, բոլորս էլ կխնդրենք մեր վարչապետին, որ ներեն նրանց: Բայց թալանածը պետք է վերադարձվի բյուջե:
– Դուք դա իրատեսական համարո՞ւմ եք:
– Եթե իրենք դա էլ չանեն, իրենց ապրելը պետք էլ չի: Ինչի՞ համար են ապրում, եթե իրենց երկիրն այս վիճակում է: Ես չեմ տարանջատում Հայաստանը Արցախից, ես ընդհանուր եմ նայում:
– Դուք այս ընթացքում նվիրատվություններ արե՞լ եք «Հայաստան» համահայկական հիմնադրամին:
– Այո, արել եմ փոխանցումներ, իմ բոլոր ընկերները, Ամերիկայում գտնվող հարազատները, բոլորն էլ արել են: Արաբական Միացյալ Էմիրությունների իմ գործընկերների հետ եմ խոսել, նրանք էլ են պատրաստվում ընկերներով մեծ գումար փոխանցել: Բոլորս էլ անում ենք ու անընդհատ ենք անում: Եթե իմ գումարներն էլ վերադարձնեն Արամ Հարությունյանից, Վարդան Այվազյանից, ես պատրաստ եմ ուղիղ կեսը նվիրել Հայաստանի ու Արցախի բանակներին: Ես պատրաստ եմ գնալ Ղարաբաղ, մի շենք կառուցել ու նվիրել բնակիչներին:
– Այս օրերին կառավարության հրաժարականի պահանջով է հանդես եկել Վազգեն Մանուկյանը, նույն առաջարկով է հանդես եկել նաև ռուսաստանաբնակ գործարար Սերգեյ Համբարձումյանը: Ինչպե՞ս եք գնահատում սա:
– Ես կարծում եմ, որ Վազգեն Մանուկյանն ու Սերգեյ Համբարձումյանը պարզապես իրավունք չունեն խոսելու: Սերգեյ Համբարձումյանը թող հանգիստ նստի տեղը: