Գերմանիայի խորհրդարանում՝ Բունդեսթագում, այսօր Արցախի հարցով տեղի է ունեցել քննարկում, որի վերաբերյալ «Առաջին լրատվական»-ի հետ զրույցում մանրամասներ է ներկայացրել ԱԺ «Իմ քայլը» խմբակցության պատգամավոր Վիկտոր Ենգիբարյանը:
Նրա խոսքերով՝ բոլոր խմբակցություններից 2-3 հոգի ելույթ են ունեցել, լայն քննարկում է եղել. «Պետք է ասեմ, որ թե՛ Սիրիայից վարձկանների խնդիրը, թե՛ Թուրքիայի անմիջական մասնակցության հարցը իրենց մոտ արձանագրվել է: Այսինքն՝ դրա շուրջ բանավեճ գոյություն չունի: Հայոց ցեղասպանության հետ կապված 1-2 ելույթներ եղան, մասնավորապես, հիշատակեցին, որ Գերմանիան 4 տարի առաջ է ճանաչել Հայոց ցեղասպանությունը, և այդ բանաձևում Գերմանիան ընդունում է նաև իր պատասխանատվության բաժինը: Եղան պատգամավորներ, որոնք ասացին, որ այս դեպքում էլ մենք պետք է կանխարգելիչ պատասխանատվությամբ հանդես գանք»:
Ենգիբարյանը հավելեց, որ խոսվել է նաև Մադրիդյան սկզբունքների մասին, պատգամավորներից մեկը թվարկել է այդ սկզբունքները և ասել, որ Գերմանիան պետք է աջակցի, որ այդ սկզբունքները կիրառվեն:
«Կային 1-2 պատգամավորներ, որոնք հստակ նշում էին, որ, միջազգային իրավունքի համաձայն՝ այդ տարածքները պատկանում են Ադրբեջանին, բայց կային նաև պատգամավորներ, որոնք հայտարարեցին, որ Արցախի հայությանը պետք է տրվի ինքնորոշման իրավունք:
Ելույթ ունեցավ նաև այս օրերին Արցախ ժամանած պատգամավորներից մեկը, ով իր աչքով տեսածի մասին խոսեց և ասաց, որ ապացույցներ ունեն, որ Շուշիի Ամենափրկիչ Ղազանչեցող եկեղեցին ռմբակոծվել է ՆԱՏՕ-ի սպառազինությանը պատկանող արկով»,- ասաց Վիկտոր Ենգիբարյանը:
Նա նկատեց, որ թեև հայանպաստ ելույթներ շատ եղան, բայց շատ ոգևորվել պետք չէ, որովհետև Թուրքիային դատապարտող որևէ բանաձև չընդունվեց:
«Իհարկե, այդ ելույթները կարևոր են, հատկապես իշխող քրիստոնեա-դեմոկրատական կուսակցության ներկայացուցիչն ասաց, որ մեր համբերության բաժակը Թուրքիայի մասով լցվում է, որ մեր համբերությունն էլ չափ ու սահման ունի: Նա փաստորեն զգուշացնում էր Թուրքիային ձեռքերը հեռու պահել տարբեր տեղեր կոնֆլիկտներ հրահրելուց»,- ընդգծեց պատգամավորը:
Նա նաև հիշեցրեց, որ պետք չի մոռանալ, թե Գերմանիան ինչքան մեծ թուրքական ներկայություն ունի և շատ կարևոր պետություն է Թուրքիայի համար, և որ նրանք փոխադարձ լուրջ տնտեսական գործընկերներ են: