Ժնևում մեկնարկել են Հայաստանի և Ադրբեջանի արտգործնախարարների և ԵԱՀԿ Մինսկի խմբի համանախագահների հանդիպումները: Շուշիի ուղղությամբ Ադրբեջանի կողմից հարձակման ձախողումն ինչ ազդեցություն կարող է ունենալ ժնևյան այդ բանակցությունների վրա: «Առաջին լրատվական»-ի հետ զրույցում, անդրադառնալով այս հարցին, վերլուծաբան Գոռ Մադոյանը նշեց, որ իր կարծիքով դա որևէ շոշափելի ազդեցություն չի կարող ունենալ այդ բանակցությունների վրա: Միգուցե հումանիտար առումով որոշակի առաջընթաց լինի, բայց ամբողջական հրադադարի հաստատման հեռանկար չեմ տեսնում: Ճակատում խնդիրներ կան, մեր հաջողություններն այնքան շոշափելի չեն եղել, որ կարողանան անդրադառնալ ժնևյան հանդիպման վրա: Միգուցե երբ մեր հաղթարշավը շարունակվի և բեկում մտնի, դա արդեն ազդեցություն կունենա հետագա հանդիպումների վրա»:
«Քաղաքացու որոշում» կուսակցության գործադիր մարմնի անդամ Վլադ Հովհաննիսյանի դիտարկմամբ՝ դիվանագիտական ճակատը առաջին հերթին կոչված է ռազմաճակատում գրանցված հաջողությունները լեգիտիմացնելու, միջազգային իրավունքի տեսանկյունից հաստատելու և աշխարհին ներկայացնելու: «Մենք ունենք կայացած բանակ, որը հինգերորդ սերնդի պատերազմ է վարում, տապալում է Թուրքիա-Ադրբեջան-ահաբեկիչներ եռամիասնության ռազմական պլանը, բայց դիվանագիտական հատվածը չի հասել այն մակարդակին, որ հասնի բանակի հետևից, այս առումով ունենք խնդիր»,- ասաց Հովհաննիսյանը:
ԱԺ պատգամավոր Վաղարշակ Հակոբյանի խոսքով՝ ցանկացած բանակցություն, որպեսզի լինի մեզ համար շահեկան պայմաններում, մեր ռազմական հաջողություններից հետո պետք է լինի: «Այս ընթացքում, հատկապես վերջին օրերին, ականատես ենք լինում մեր բանակի հաջողություններին, և համադրելով փաստերը՝ լիահույս եմ, որ բեկումը շատ չի ուշանա: Այն ինչ կատարվել է Շուշիում և Կուբաթլուի հատվածում, տեսանելի է դարձնում, որ բեկում կլինի, որը կստեղծի նախադրյալներ՝ բանակցային սեղանի շուրջ մեր ազգային շահը ավելի առարկայական դարձնելու և կոնկրետ արդյունքների հասնելու համար:
Վլադ Հովհաննիսյանի խոսքով՝ ԼՂ խնդրի կարգավորման միակ վայրը ռազմաճակատն է. «Մեր բանակը ռազմաճակատում է լուծելու հարցը, որից հետո նոր միջազգային հանրությունը, ԵԱՀԿ Մինսկի խումբը հաշվի են նստելու այն արդյունքների հետ, որն ունենալու ենք ռազմաճակատում»:
Քննարկման մասնակիցների դիտարկմամբ՝ Արցախում տեղի ունեցող իրադարձությունները մարտահրավեր են ամբողջ քաղաքակիրթ աշխարհին:
Մանրամասն՝ տեսանյութում: