Լուրեր
Այսօր Ֆրանսիայում հայերը ծայրահեղ վտանգի տակ են
  • 12:30
  • 2020-10-31
  • Դիտումներ՝ *

Ֆրանսիական Նիս քաղաքում զինված ահաբեկչի կողմից եկեղեցու մոտ հավաքված մարդկանց վրա հարձակման հետևանքով մի կին գլխատվել է, երկուս հոգի սպանվել են: Ֆրանսիական մեկ այլ քաղաքում՝ Ավինյոնում զինված ահաբեկիչը, «Ալլահ աքբար» գոռալով, հարձակվել է ոստիկանների վրա, ոստիկանները ստիպված կրակ են բացել նրա ուղղությամբ:

«Ֆրանսիայում բավականին բարդ մթնոլորտ է ստեղծվել»,- թեմայի շուրջ «Առաջին լրատվական»-ի հետ տեսակապով զրույցում ասաց Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանը:

«Վերջին ամիսներին Ֆրանսիայի և Թուրքիայի հարաբերությունները բարդացել են, թշնամական հարաբերություններ են ընդգծվել: Թուրքիայի նախագահի վերաբերմունքը Ֆրանսիայի նախագահի նկատմամբ և ընդհանրապես Ֆրանսիայի հանդեպ ուղղակի կապ ունեն այն ամենի հետ, ինչ տեղի ունեցավ Նիսում և Ավինյոնում, որովհետ անկարգուկանոն ակցիաներ են իրականացնում, ջիհադիստները, որ դրսում են աշխատում, մթնոլորտի ազդեցության տակ են, և նրանց ուղղորդում են այսպիսի ակտեր կատարել: Էրդողանը մեծ պատասխանատվություն ունի այս երկու ակտերի ուղղությամբ: Եվ նույն ժամանակահատվածում հակահայ ցույցեր տեղի ունեցան Ֆրանսիայում, հարյուրավոր թուրքեր, ծայրահեղականներ, «գորշ գայլեր», որ Էրդողանի ճնշման տակ են և նրա ֆինանսական միջոցներով են աշխատում, շատ խիստ հակահայկական ցույցեր են իրականացրել, որպեսզի մեզ վրա տպավորություն գործեն»,- նշեց Փափազյանը:

Սեպտեմբերի 27-ից ի վեր, երբ Ադրբեջանը պատերազմ սկսեց հայերի դեմ, ֆրանսահայ համայնքը բազմաթիվ միջոցառումներ կազմակերպեց՝ ցույցեր, մամլո աուլիսներ, կապեր հաստատվեցին արտաքին գործերի նախարարի, նախագահության հետ և վերջին իրադարձություններից հետո նաև ներքին գործերի նախարարի հետ:

«Ամեն ինչ դրական ձևով ենք անում, որպեսզի Ֆրանսիայի նախագահը պրոհայկական դիրքորոշում ունենա: Մենք քննադատեցինք Ֆրանսիայի արտգործնախարարի արտահայտությունը, որ Ֆրանսիան ստիպված է մնալ չեզոք՝ լինելով Մինսկի խմբի համանախագահ: Մենք հակադարձեցինք՝ ասելով, որ եթե Մինսկի խմբի բոլոր համանախագահ երկրները զենք են վաճառում Ադրբեջանին, արդեն իսկ անկողմնակալ չեն, և հիմա, երբ ժողովուրդն է վտանգի տակ, չեզոքություն պահելը մեղսագործություն է:

Մենք լուրջ աշխատանքներ ենք կատարում: Մակրոնը պրոհայկական դիրքորոշում ունի, բայց հայտարարություններից անդին, մենք կոչ ենք անում զորք ուղարկել, որպեսզի արգելվի 2015թ-ի նման 2020-ին նոր ջարդի վտանգը:

Վերջին հանգրվանում Էրդողանը ծայրահեղացրեց իր հայտարարությունները, իր քաղաքականությունը Ֆրանսիայի հետ, և դրան հաջորդեցին հակահայ ցույցերը և ահաբեկչական դեպքերը Նիսում և Ավինյոնում: Ֆրանսիայի հանրությունը և մամուլն արդեն գիտակցում են, որ Էրդողանը վտանգավոր է նաև Եվրոպայի համար»,-ասաց Փափազյանը: Նա նաև հավելեց, որ այսօր Ֆրանսիայի հայությունը վտանգի տակ է:

  • Դիտումներ՝ *